က​လေးမြို့မှဆင်းလာ​သော စစ်​ကောင်စီတပ်အား သွားကြိုသည့် ပျူအဖွဲ့ပါစစ်အုပ်စု မင်းကင်းတွင် တိုက်ခိုက်ခံရပြီး ၁၃ဦး​ထက်မနည်းသေဟုဆို

စစ်ကိုင်းတိုင်း၊ မင်းကင်းမြို့နယ်တွင် ကလေးမြို့မှဆင်းလာသည့်စစ်​ကောင်စီတပ်အားလာကြိုသော ပျူစောထီးများပါ စစ်အုပ်စု မိုင်းဆွဲတိုက်ခိုက်ခံရပြီး ၁၃ဦးထက်မနည်းသေဆုံးကြောင်း မင်းကင်းနွေဦးတော်လှန်ရေးက ထုတ်ပြန်သည်။

ယမန်နေ့ (ဧပြီ ၂၅ ရက်)နံနက် ၁၁ နာရီခွဲခန့်အချိန်က ကလေးမြို့ ဒကစမှဆင်းလာသော အကြမ်းဖက်စစ်ကား ၃ စီးအား မင်းကင်းမြို့မှ အကြမ်းဖက်စစ်တပ်နှင့်ပျူ အင်အား ၇၀ခန့်က သွားကြိုရာ မင်းကင်းမြို့နယ် ပြည်သူ့ကာကွယ်ရေးတပ်ရင်း(၂) ၊ တပ်ခွဲ (၁)မှ ဗျူဟာအရကြိုတင်ပြင်ဆင်ထားသော တိုက်မိုင်းများဖြင့် တိုက်ခိုက်ခဲ့ခြင်းဖြစ်ကြောင်း မင်းကင်းနွေဦးတော်လှန်ရေးက ထုတ်ပြန်သည်။

သင်္ဘော – ကမ်းပြည့် (ကဗျစ်) အရောက်တွင် တိုက်မိုင်း ပဒေသာမိုင်းများဖြင့် ဖောက်ခွဲတိုက်ခိုက်ခဲ့ရာ နေရာတွင်ပင် အကြမ်းဖက်စစ်တပ်နှင့်ပျူ ၁၃ဦး သေဆုံးခဲ့ပြီး ရုပ်အလောင်းများအား ကမ်းပြည့် (ကဗျစ်) ရွာဇရပ်ပေါ်တွင် တင်ထားခဲ့ကြောင်းသိရပြီး နောက်ထပ်ထိခိုက်ပြီး ခြေပြတ်၊လက်ပြတ်ဖြစ်သွားသည့် အကြမ်းဖက်စစ်တပ်နှင့် ပျူအုပ်စုအား မင်းကင်းမြို့ အမှတ် (၁)ရပ်ကွက် ဘိုးဘွားရိပ်သာတောင်ပေါ်သို့ ခေါ်ဆောင်သွားကြကြောင်း အသိ​​ပေးထားသည်။

အဆိုပါထိတွေ့မှုတွင် မိမိတို့ပြည်သူ့တပ်သားများမှ ထိခိုက်မှုမရှိကြောင်း တပ်ရင်း (၂) တာ၀န်ရှိသူက ပြောကြားခဲ့သည်ဟု မင်းကင်းနွေဦးတော်လှန်ရေးက ဆိုသည်။

Public Service Announcement

ထပ်မံသိရှိရသည့် သတင်းတစ်ခုမှာ မင်းကင်းမြို့နယ် မြစ်ရိုးအောက်ဒေသ သံပေါက်ကျေးရွာကို မြစ်ရိုးအောက်အခြေစိုက်ထိုင်နေသည့် အကြမ်းဖက်အုပ်စုမှ တဲတစ်လုံးအား မီးရှို့ခဲ့ပြီး တစ်ဖက်ကမ်းသို့ ကူးသွားခဲ့ကြောင်း၊ တဲတစ်လုံးသာမီးလောင်နေသည်ကို မကျေနပ်သော ပျူများမှာ သံပေါက်ဘက်ကမ်းသို့ ပြန်လည် ကူးလာခဲ့ပြီး ရွာလုံးကျွတ်မီးရှို့နေကြောင်း၊ယခုထိသိရှိရသည်မှာ သံပေါက် ရွာတ၀က်ခန့်မီးလောင်ကျွမ်းသွားပြီဟု ‌ရှောင်တိမ်းနေသာ ဒေသခံတဦးက ပြောကြားသည်ဟု မင်းကင်းနွေဦးတော်လှန်ရေးက သတင်းထုတ်ပြန်ထားသည်။

အကြမ်းဖက်စစ်တပ်အား ခုခံတော်လှန်တိုက်ခိုက်နေသည့် မင်းကင်းမြို့နယ်တွင် ဧပြီလဆန်းပိုင်းကလည်း အကြမ်းဖက်စစ်အုပ်စု၊ ပျူစောထီးများနှင့် ဒေသတွင်းပြည်သူ့ကာကွယ်ရေးအဖွဲ့များ ပစ်ခတ်တိုက်ခိုက်ခဲ့ကြပြီး အကြမ်းဖက်အုပ်စုများဘက်မှ ထိခိုက်သေဆုံးမှုများ ရှိခဲ့သည်။