စစ်ကောင်စီတရားရုံးက နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို ထောင်ဒဏ်ချမှတ်ခဲ့ခြင်းအပေါ် ဥရောပသမဂ္ဂ(EU)က ပြစ်တင်ရှုတ်ချလိုက်သည်။
စစ်ကောင်စီလက်အောက်ခံတရားရုံးသည် နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို ဧပြီ ၂၇ ရက်တွင် ထောင်ဒဏ်ချမှတ်ခြင်းနှင့် အဆိုပါတရားခွင်များသည် နိုင်ငံရေးအရ လှုံ့ဆော်မှုဖြစ်ကြောင်း အီးယူက ထုတ်ပြန်သည်။
စစ်ကောင်စီ၏ တရားစီရင်မှုဖြစ်စဉ်များသည် ဒေါ်အောင်ဆန်းစုကြည်နှင့် အမျိုးသားဒီမိုကရေစီအဖွဲ့ချုပ်အပါအဝင် ဒီမိုကရေစီနည်းကျရွေးကောက်ခံခေါင်း ဆောင်များကို ဖယ်ရှားရန်ရှင်းလင်းသော ကြိုးပမ်းမှုဖြစ်ကြောင်း အီးယူက ဆိုသည်။
ထို့အပြင် အာဆီယံဘုံဆုံးဖြတ်ချက် ၅ရပ်က တောင်းဆိုသော အားလုံးပါဝင်သည့်တွေ့ဆုံဆွေးနွေးမှုမှလည်း ဖယ်ထုတ်ရန် အထင်အရှားကြိုးပမ်းခြင်းဖြစ်ကြောင်း အီးယူက ထုတ်ပြန်သည်။
“အာဏာသိမ်းချိန်ကစလို့ တရားလက်လွှတ်ဖမ်းဆီးထိန်းသိမ်းထားသူအားလုံးနဲ့ နိုင်ငံရေးအကျဉ်းသားအားလုံးကို ခြွင်းချက်မရှိ ချက်ချင်းပြန်လွှတ်ပေးဖို့ ကျွန်တော်တို့ရဲ့ အရေးပေါ်တောင်းဆိုမှုကို ထပ်လောင်းအတည်ပြုပါတယ်”ဟု အီးယူက ဆိုသည်။
တရားမဝင်အာဏာသိမ်းသူများက ရွေးကောက်ခံ နိုင်ငံ့ခေါင်းဆောင်များကို ထောင်ဒဏ်ချမှတ်နေခြင်းသည် တရားဥပဒေစိုးမိုးရေးကို ဖြိုဖျက်သည့်နောက်ထပ်ခြေလှမ်းဖြစ်ပြီး မြန်မာနိုင်ငံတွင် လူ့အခွင့်အရေးကို ဗြောင်ကျကျနောက်ထပ်ချိုးဖောက်မှုဖြစ်ကြောင်း အီးယူက ထုတ်ပြန်သည်။