ရန်ကုန် အရှေ့ပိုင်းတက္ကသိုလ် ကျောင်းသားများသမဂ္ဂ (ရရတကသ) အဖွဲ့ဝင်၊ ကော်မတီတာဝန်ခံ ကိုကောင်းခန့်နိုင် အပါအဝင် လူငယ်လေးဦးကို ယမန်နေ့ (ဧပြီ ၂၈) ညနေပိုင်းတွင် အကြမ်းဖက်စစ်ကောင်စီဝင်များက အဓမ္မဖမ်းဆီးသွားကြောင်း အရှေ့ပိုင်းတက္ကသိုလ်ကျောင်းသားများသမဂ္ဂက ယနေ့ (ဧပြီ ၂၉) ထုတ်ပြန်သည်။
ယင်းလူငယ်လေးဦးသည် ယမန်နေ့ (ဧပြီ ၂၈ ရက်) ညနေပိုင်းတွင် ဒေါပုံဘောလုံးကွင်း၌ အကြမ်းဖက်စစ်တပ်၏ မတရားဖမ်းဆီးခြင်းကို ခံလိုက်ရခြင်း ဖြစ်ကြောင်း သိရသည်။
ဖမ်းဆီးခံရသူများမှာ ကိုကောင်းခန့်နိုင် (စတုတ္ထနှစ် ကုန်ထုတ်ဓာတုဗေဒ) အပါအဝင် ရန်ကုန်အရှေ့ပိုင်းတက္ကသိုလ်ကျောင်းသားများဖြစ်ကြသော ကိုဟိန်းထက်ဇော် (ဒုတိယနှစ် မြန်မာစာ အဝေးသင်)၊ ကိုသီဟအောင် (ဒုတိယနှစ် ဥပဒေပညာ အဝေးသင်) တို့နှင့်အတူ (၁၂) နှစ်အရွယ် ကလေးတစ်ဦး စုစုပေါင်း လေးဦးတို့ ဖြစ်သည်။
” ကိုကောင်းခန့်နိုင်နဲ့ မနေ့က အဆက်အသွယ် မရလို့ လိုက်စုံစမ်းကြည့်မှ စစ်တပ်ရဲ့ ဖမ်းဆီးခြင်း ခံရတာကို သိရတာပါ။ ဖမ်းတာက လေးယောက်ဖမ်းခံရပြီး ဘယ်ကိုဖမ်းသွားလဲ ဆိုတာတော့ မသိရသေးပါဘူး။ စုံစမ်းနေတုန်းပဲ ရှိပါသေးတယ် ” ဟု ကျောင်းသားသမဂ္ဂဝင် လူငယ်တစ်ဦးက ဆိုသည်။
Public Service Announcement
ရန်ကုန်အရှေ့ပိုင်းတက္ကသိုလ် ကျောင်းသားများသမဂ္ဂ အနေဖြင့်လည်း ဖမ်းဆီးခံ ကိုကောင်းခန့်နိုင် အပါအဝင် လူငယ်လေးဦး၏ သတင်းအား မပြတ်နားစွင့်နေပြီး ယင်းတက္ကသိုလ်ကျောင်းသားများ တစ်စုံတစ်ရာဖြစ်ခဲ့ပါက အကြမ်းဖက်စစ်အုပ်စု၏ တာဝန်သာဖြစ်ကြောင်း သတင်းထုတ်ပြန်ထားသည်။
