ပြည်သူကာကွယ်ရေးတပ်ဖွဲ့သည် တဖြည်းဖြည်းနှင့် အင်အားကြီးမားလာပြီး ရန်သူစစ်ကောင်စီတပ်ကို ထိရောက်စွာချေမှုန်းနိုင်လာပြီဖြစ်ကြောင်း အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလက ပြောကြားသည်။
ယနေ့ (မေလ ၅ရက်) ကျရောက်သည့် ပြည်သူ့ကာကွယ်ရေးတပ်မတော်(PDF) တည်ထောင်ကြောင်း ကြေညာခြင်း တစ်နှစ်ပြည့်အမှာစကားတွင် ယာယီသမ္မတက ထိုသို့ပြောဆိုခဲ့ခြင်းဖြစ်သည်။
ပြည်သူ့ကာကွယ်ရေးတပ်ဖွဲ့သည် လက်ရှိတွင် တပ်ရင်းပေါင်း ၂၅၀ ကျော်ဖြင့် ဖွဲ့စည်းထားခဲ့ပြီး လူအင်အား တောင့်တင်းလာနေပြီဖြစ်သည်ဟု ယာယီသမ္မတက ပြောသည်။
“ပထမပိုင်းမှာ လက်လုပ်သေနတ်တွေနဲ့ ဖြစ်သလို တော်လှန်လာခဲ့ကြပေမယ့် အခုအချိန်မှာတော့ ပြည်သူလူထုရဲ့ ဝိုင်းဝန်းကူညီမှု တီထွင် ကြံဆမှုကြောင့် လက်နက်ကောင်းတွေလည်း ကိုင်လာနိုင်ကြပြီဖြစ်ပါတယ်။ဒါကြောင့်မို့လို့ တစ်ဖက်ရန်သူကို ချေမှုန်းတဲ့အခါတော်တော်ထိရောက်သွားပြီး မင်းအောင်လှိုင်ရဲ့ လက်အောက်က စစ်တပ်များဟာ ပြည်သူလူထုဘက်ကို ပြောင်းလဲပြီးတော့ ဘက်ပြောင်းလာတာတွေ အများကြီးဖြစ်ပါတယ်”ဟု ယာယီသမ္မတက ပြောသည်။
Public Service Announcement
ထိုသို့ အောင်မြင်လာစေရန် အဖက်ဖက်ကကူညီကြသည့် ကူညီကြသည့် ပြည်သူလူထုများ၊ ပြည်တွင်းပြည်ပရှိ အလှူရှင်များ ၊ GZ လူငယ်များ၊ ကျောင်းသားအရွယ်များအားလုံးကို အထူဂုဏ်ပြုလိုသည်ဟု ၎င်းက ဆိုသည်။
“ဒီလိုမျိုးဖြစ်လာအောင် စစ်ရေးလေ့ကျင့်ပေးတဲ့ တိုင်းရင်းသားလက်နက်ကိုင်အဖွဲ့အစည်းများကိုလည်း အထူးကျေးဇူးတင်ပါတယ်။ ကျွန်တော်တို့ရဲ့ လုပ်ဆောင်ချက်ဟာ အားလုံးပါဝင်တဲ့ တော်လှန်ရေးဖြစ်ပါတယ်။ ဒီတော်လှန်ရေးဟာ အနာဂတ်မှာ ပြည်ထောင်စုမြန်မာနိုင်ငံရဲ့ သမိုင်းကို တွင်ရစ်ခဲ့မှာဖြစ်ပါတယ်”ဟုလည်း ယာယီသမ္မတက ပြောကြားသည်။
တော်လှန်ရေး၌ အဖမ်းခံရသူများ၊ စစ်တပ်၏နှိပ်စက်မှု အမျိုးမျိုးခံရသူများ၊ အိမ်ထောင်များ ပျက်စီးသွားသူများ မီးရှို့ခံရသည့်ရွာများ၊ အသက်ပေးသွားသည့် ရဲဘော်ရဲဘက်များအားလုံးကို အထူးလေးစားဦးညွတ်ကြောင်း ယာယီသမ္မတက ပြောကြားခဲ့ပြီး ဆက်လက်၍ တော်လှန်ရေး အောင်မြင်ပြီးမြောက်သည်အထိ ဇွဲမလျှော့ဘဲ ကြိုးစားရန် တိုက်တွန်းခဲ့သည်။
