ထန်းတပင်မြို့နယ်မှာရှိတဲ့ PDF စခန်းတစ်ခုကို စစ်ကောင်စီတပ်က ဝင်ရောက်စီးနင်းတိုက်ခိုက်ခဲ့ရာ NLD အမတ် နော်ခရစ္စထွန်းရဲ့ အမျိုးသားဖြစ်သူ ဦးစိုင်းမောင်အံ ကျဆုံးသွားခဲ့တယ်လို့ တောအူးကရင်သတင်းစဉ်ရဲ့ ဖော်ပြချက်အရ သိရပါတယ်။
မေလ ၄ ရက် မနက် ၅ နာရီအချိန်က ကေအဲန်ယူ-တောင်ငူခရိုင် ထန်းတပင်မြို့နယ် KNLAတပ်ရင်း (၆) နယ်မြေအတွင်းက PDF ရဲ့ လှည်းဘွဲကြီး စခန်းကို စစ်ကောင်စီတပ်က သာလွန်အင်အားနဲ့ ဝင်ရောက်စီးနင်းတိုက်ခိုက်ခဲ့ရာကနေ အပြန်အလှန်ပစ်ခတ်မှု စတင်ဖြစ်ပွားခဲ့တာဖြစ်ပါတယ်။
အဲ့ဒီနေ့ မနက် ၅ နာရီတစ်ကြိမ် ၉ နာရီခွဲခန့်မှာတစ်ကြိမ် ၁၁ နာရီမှာတစ်ကြိမ် အပြန်အလှန်ပစ်ခတ်မှုဖြစ်ပွားခဲ့ပြီး စစ်ကောင်စီတပ်က လက်နက်ကြီးလက်နက်ငယ်တွေနဲ့ ရမ်းသမ်းပစ်ခတ်ခဲ့တာကြောင့် သံတောင်ကြီးမြို့နယ် အမျိူးသာဒီမိုကရေစီအဖွဲ့ချုပ် NLDကိုယ်စားလှယ်အမတ် နော်ခရစ္စထွန်းရဲ့ အမျိူးသား ဦးစိုင်းမောင်အံကျဆုံးသွားခဲ့တာလို့ တောအူးကရင်သတင်းစဥ်မှာ ပါရှိတာပါ။
“တခြားသူတွေလွတ်သွားပါတယ်။ သူကျတော့ ထွက်ပြေးမလွတ်အဆုံး လက်နက်ထိမှန်လို့ ကျဆုံးခဲ့ပြီ။ လက်နက်အချို့လည်းပါသွားခဲ့တယ်” လို့ စခန်းနဲ့နီးစပ်သူတစ်ဦးက ဆိုပါတယ်။
Public Service Announcement
မေလ ၄ရက်နေ့ ညနေ ၃ နာရီခွဲအချိန် ထန်းတပင်မြို့အနီးက တခြား PDF စခန်းတစ်ခုကိုလည်း စစ်ကောင်စီတပ်အင်အား ၅၀ ခန့်က ဝင်ရောက်စီးနင်းပစ်ခတ်ခဲ့သေးပြီး PDF တပ်သားတစ်ဦး ဒဏ်ရာရရှိသွားခဲ့ကာ စခန်းကိုလည်း ဆုတ်ခွာသွားခဲ့ရသေးတာဖြစ်ပါတယ်။
စစ်ကောင်စီတပ်ဟာ စခန်းတွေကို ဝင်ရောက်မစီးနင်းခင် မေ ၂ ရက်နေ့ကတည်းက စစ်ကားနှစ်စီးနဲ့ ရှားစေးဘိုး ရေလျံစခန်းကို အင်အားဖြည့်တက်လာပြီး မေ ၃ ရက်နေ့ မနက် ၃ နာရီအချိန်ခန့်က လယ်ကူးရွာ ခူထီးလိုချောင်းကို ဖြတ်တက်လာကာ ကစယ်ဒိုတောင်ခြေအထိ နယ်မြေကျော်ရောက်ရှိလာခဲ့တာဖြစ်ပါတယ်။
စစ်ကောင်စီတပ်ဟာ မေ ၃ ရက်နေ့ ညပိုင်းအချိန်မှာ ဒရုန်းတွေကင်းထောက်လှမ်းခဲ့ပြီး မေ ၄ ရက်နေ့ မနက်အစောပိုင်းမှာ ထီခီးဒေသနဲ့ မဝေးတဲ့ လှည်းဘွဲကြီးစခန်းကို အခုလိုဝင်ရောက်စီးနင်း တိုက်ခိုက်ခဲ့တာလို့ တောအူးကရင်သတင်းစဉ်ရဲ့ထုတ်ပြန်ထားချက်အရ သိရပါတယ်။
