အကြမ်းဖက်စစ်ကောင်စီတပ်သား ၂၀ခန့် သေနိုင်ဟုဆို
စစ်ကိုင်းတိုင်း၊ ဘုတလင်မြို့နယ်တွင် ကျေးရွာများအား မီးရှို့ဖျက်ဆီးခဲ့သည့် အကြမ်းဖက်စစ်ကောင်စီတပ်အား ဒေသတွင်းပြည်သူ့ကာကွယ်ရေးအဖွဲ့များက ခုခံတိုက်ခိုက်ခဲ့ရာ စစ်အုပ်စုဘက်မှ သေဆုံးထိခိုက်မှုများနိုင်ကြောင်း ဒေသခံများက ပြောသည်။
တိုက်ခိုက်ခံရသည့် အကြမ်းဖက်စစ်အုပ်စုသည် ဝင်မနားရဲစခန်းမှဖြစ်ပြီး မေလ ၄ရက်က ၎င်းတို့စခန်းအပါအဝင် ကျေးရွာနေအိမ်အချို့အား မီးရှို့ဖျက်ဆီးပြီး ထွက်ပြေးလာခဲ့သည့် စစ်ကြောင်းဖြစ်သည်။
ထိုအကြမ်းဖက်စစ်အုပ်စုသည် မေလ ၄ရက် ည ၈နာရီ ၅၀မိနစ်ခန့်တွင် ဘုတလင်မြို့နယ်သို့ ရောက်ရှိလာကာ တော်ဦးဘရွာကို မီးရှို့ဖျက်ဆီးပြီး တပ်စွဲခဲ့ကြောင်း ဒေသခံများက ပြောသည်။
Public Service Announcement
ယမန်နေ့(မေလ ၅ရက်)နံနက် ၆နာရီခန့်တွင် ၎င်းတို့သည် တော်ဦးဘရွာမှ ထွက်ခွာစဥ် ဒေသတွင်းပြည်သူ့ကာကွယ်ရေးအဖွဲ့များ၏ ခုခံတိုက်ခိုက်မှုခံခဲ့ရကြောင်း၊ အကြမ်းဖက်စစ်သား ၂၀ခန့်သေဆုံးနိုင်သည်ဟုသိရကြောင်း ဒေသခံများက ပြောသည်။
ဒေသတွင်းပြည်သူ့ကာကွယ်ရေးအဖွဲ့မှ ရဲဘော်နှစ်ဦး ထိခိုက်ဒဏ်ရာရရှိခဲ့သည်ဟုလည်း သိရသည်။
ထို့အပြင် အကြမ်းဖက်စစ်အုပ်စုသည် ယနေ့(မေလ ၆ ရက်)နံနက် ၃နာရီခန့်က ဘုတလင်မြိုနယ်၊ ကံသစ်ကျေးရွာကို မီးရှိုဖျက်ဆီးနေကြောင်း ဒေသခံများက ပြောသည်။
