စစ်ကောင်စီထောက်တိုင်အုပ်ချုပ်ရေးမှူးများ မေလ ၁၇ရက်နောက်ဆုံးထား ရာထူးမှနှုတ်ထွက်ရန် ပုလော PDF သတိပေး

ပုလောမြို့နယ်အတွင်းရှိ စစ်ကောင်စီ ထောက်တိုင် အုပ်ချုပ်ရေးမှူးများအနေဖြင့် မေလ ၁၇ရက် နောက်ဆုံးထား၍ စစ်အာဏာရှင်ခန့်အပ်ထားသော ရာထူးမှ နှုတ်ထွက်ကြရန်နှင့် စစ်ကောင်စီအတွက် ဆက်လက် အလုပ်လုပ်မပေးကြရန် ပုလောပြည်သူ့ကာကွယ်ရေးတပ်(PDF)က ယနေ့( မေလ ၁၀ရက်) သတိပေးချက် ထုတ်ပြန်သည်။

ထိုသို့ သတိပေးချက်ထုတ်ပြန်ရာ၌ ပုလောမြို့ပေါ် ရပ်ကွက်နှင့် ကျေးရွာများမှ အုပ်ချုပ်ရေးမှူးများ၏ အမည်စာရင်းများနှင့်အတူ ဖော်ပြခဲ့ခြင်းဖြစ်သည်။

သတိပေးကြေညာချက်ကို မလိုက်နာဘဲ ဆက်လက် လုပ်ဆောင်နေမည်ဆိုပါက အုပ်ချုပ်ရေးမှူးများ၏ အသက်အန္တရာယ်ကို တာဝန်မယူကြောင်းလည်း ဖော်ပြထားသည်။

အာဏာသိမ်းစစ်ကောင်စီသည် ၎င်းတို့၏ လက်ကိုင် တုတ်များကိုအသုံးချပြီး အုပ်ချုပ်ရေးစနစ်ကို ဆက်လက်လည်ပတ်ကာ ပြည်သူများကို အနိုင်ကျင့် အုပ်ချုပ်လျက်ရှိသည်ဟု ပုလော PDFက ထုတ်ပြန်ခဲ့ပြီး ပုလော PDF အနေဖြင့် အာဏာရှင်စနစ်ကို ဖြုတ်ချရန်အတွက် အုပ်ချုပ်ရေးယန္တရားကို ဆက်လက်တိုက်ဖျက်သွားမည်ဟု ဖော်ပြထားသည်။

Public Service Announcement

ထို့ကြောင့် စစ်ကောင်စီခန့်အပ်ထားသော မြို့နယ်အုပ်ချုပ်ရေးမှူးများ၊ ရပ်ကွက်နှင့် ကျေးရွာ အုပ်ချုပ်ရေးမှူးများအနေဖြင့် ပြည်သူနှင့်အတူ ရပ်တည်ကာ ရာထူးတာဝန်များကို ဆက်လက် ထမ်းဆောင်ခြင်းမပြုဘဲ နှုတ်ထွက်ကြရန် တောင်းဆိုသည်ဟု ပုလော PDFက ထုတ်ပြန်သည်။