စစ်ကိုင်းတိုင်း၊ မုံရွာ-မန္တလေးလမ်းမကြီးပေါ်တွင် ယာဥ်ငယ်တစ်စီးဖြင့် ဖြတ်သန်းလာသည့် စစ်အုပ်စုအား မိုင်းသုံးလုံးဖြင့် ဖောက်ခွဲတိုက်ခိုက်ခဲ့ကြောင်း PDF- South Monywa က သတင်းထုတ်ပြန်သည်။
ယနေ့(မေလ ၁၁ ရက်) နေ့လယ်ပိုင်းက မုံရွာ – မန္တလေးလမ်းမကြီးပေါ်တွင် Mini Markကား အဝါရောင်(အရပ်ကား)ဖြင့် အကြမ်းဖက်စစ်တပ်နှင့် ရဲတပ်ဖွဲ့ဝင်များ လိုက်ပါလာသည်ဟု သတင်းရသဖြင့် စောင့်ဆိုင်းခဲ့ကြောင်း PDF- South Monywa က ပြောသည်။
အဆိုပါကားကို ချောင်းဦးနှင့် ခင်မွန်ရွာကြား လမ်းပိုင်းတွင် မိုင်း သုံးလုံး တပြိုင်တည်းခွဲကာ တိုက်ခိုက်ခဲ့ကြောင်း PDF-South Monywa က အသိပေးသည်။
ကားရှေ့ပိုင်းမှာ မိုင်း နှစ်လုံး တည့်တည့်ထိမှန်၍ ဘေးသို့လည်ပြီး ၅ မိနစ်ကျော်ခန့် ရပ်တန့်နေခဲ့ကြောင်း၊ တတိယမိုင်းမှာမူ အပိုင်းအစများသာ သွားရောက် ထိမှန်နိုင်ကြောင်း၊ ထိခိုက်သေဆုံးမှုအခြေအနေ မသိရသေးကြောင်း PDF-South Monywaက ပြောသည်။
Public Service Announcement
“ကားက စစ်ကိုင်း ၃၃ က ခွေးတွေလို့ သတင်းရတာပါဗျ။၂၅ ဝန်းကျင်ရှိမယ်ကား အပြည့်ပဲ။ မစ်ရှင်သွားတဲ့ ရဲဘော်တွေ ပြောတာက ကားက မှန်အနက်တွေ တင် အရှိန်နဲ့ မောင်းလာတာ
အရပ်ဝတ်တွေပဲတွေ့တယ်။ အကုန်တော့ သေချာ မမြင်ရဘူးဗျ။ရှေ့ပိုင်းတော့ သေချာပေါက်ထိတယ်ခင်ဗျ။ ဘေးဆွဲပြီး လည်ထွက်သွားတာ။ သုံးမရအောင် ထိတာတော့ မဟုတ်ဘူးဗျ။ ၅ မိနစ်ကျော်လောက်နေတော့ ပြန်မောင်းထွက်သွားတော့လေ။”ဟု PDF-South Monywa တာဝန်ရှိသူက ပြောသည်။
မုံရွာ-မန္တလေးလမ်းပိုင်းတွင် အကြမ်းဖက်စစ်ကောင်စီယာဥ်များ မကြာခဏတိုက်ခိုက်ခံနေရပြီး ပြည်သူများ စစ်ကားများနောက် ကပ်မလိုက်ရန် ဒေသတွင်း ပြည်သူ့ကာကွယ်ရေးအဖွဲ့များက သတိပေးထားသည်။
