ခင်ဦးမြို့နယ်တွင် မီးရှို့ဖျက်ဆီးနေသော စစ်ကောင်စီတပ် မိုင်းဆွဲတိုက်ခိုက်ခံရပြီးနောက် ကျေးရွာများအား လက်နက်ကြီးဖြင့်ပစ်ခတ်၍ အဘိုးအိုတစ်ဦးဒဏ်ရာရ

စစ်ကိုင်းတိုင်း၊ ခင်ဦးမြို့နယ်ရှိ ကျေးရွာများအား မီးရှို့ဖျက်ဆီးနေသော စစ်ကောင်စီတပ် မိုင်းဆွဲတိုက်ခိုက်ခံရပြီးနောက် လက်နက်ကြီးများဖြင့် ရမ်းသမ်းပစ်ခတ်၍ အဘိုးအိုတစ်ဦးထိမှန် ဒဏ်ရာရရှိခဲ့ကြောင်း ဒေသခံများက ပြောသည်။

ရေဦးမြို့နယ်မှ အကြမ်းဖက်စစ်တပ်သည် ယနေ့(မေလ ၁၂ရက်)နံနက် ၆နာရီခန့်မှစတင်ကာ မူးမြစ်အရှေ့ဘက် ခင်ဦးနယ် ကားဆိပ်ရွာသို့ ဝင်ရောက်မီးရှို့ဖျက်ဆီးခဲ့ပြီး ပြည်သူများလည်းဖမ်းဆီးခံထားရကြောင်း ဒေသခံများက ပြောသည်။

အင်အား ၆ဝ ခန့်ပါသော အကြမ်းဖက်စစ်ကောင်စီတပ်သည် ကားဆိပ်ရွာကိုဖျက်ဆီးပြီးနောက် သရက်ပင်စုရွာဟောင်းသို့ရောက်ရှိချိန်မိုင်းဆွဲတိုက်ခိုက်ခံရ၍ အနီးဝန်းကျင်သို့ လက်နက်ကြီးလက်နက်ငယ်များဖြင့် ရမ်းသမ်းပစ်ခတ်နေကြောင်း ဒေသခံများက ပြောသည်။

“အနီးတဝိုက်ရှိ ဒေသခံများမှာ မနက်စာတောင် မစားရသေးဘဲ ထွက်ပြေးတိမ်းရှောင်နေရပါတယ်။”ဟု နယ်ခံတစ်ဦးက ပြောသည်။

Public Service Announcement

မေလ ၈ ရက်ကလည်း စစ်ကောင်စီတပ်သည် ခင်ဦးမြို့နယ်၊ မြင်းကျကျေးရွာအား မီးရှို့ဖျက်ဆီးခဲ့ရာ နေအိမ်၁၆လုံး ပြာကျခဲ့သည်။ စစ်ကိုင်းတိုင်းအတွင်း ခင်ဦးမြို့နယ်သည် အကြမ်းဖက်စစ်တပ်၏ မီးရှို့ဖျက်ဆီးမှုအခံရဆုံးနယ်ဖြစ်နေပြီး လက်ရှိအချိန်အထိ အိမ်ခြေ ၁,၄၀၈အိမ်အထိ မီးရှို့ခံထားရသည်။