မန္တလေးတိုင်း၊ မိတ္ထီလာခရိုင် ဝမ်းတွင်းမြို့နယ်တွင် စစ်ကောင်စီတပ်ယာဥ်တစ်စီးအား ပဒေသာမိုင်းဖြင့် မိုင်းဆွဲတိုက်ခိုက်ရာ သုံးဦးထက်မနည်း ထိခိုက်နိုင်ကြောင်း ဝမ်းတွင်းမြို့နယ် တော်လှန်ရေးအင်အားစု (WTRF)က ပြော သည်။
ယမန်နေ့ (မေလ ၁၂ ရက်) ည ၇နာရီအချိန်က သဲတော ရွာအဝင် လိပ်တက်ကျေးရွာ အနောက်ဘက် တံတားတွင် စစ်ကောင်စီတပ်ယာဥ်အား မိုင်းဆွဲတိုက်ခိုက်ခဲ့သည်ဟု WTRFက သတင်းထုတ်ပြန် သည်။
တိုက်ခိုက်ခံရပြီးနောက် ယာဥ်ကို အရှိန်ပြင်းစွာမောင်းပြေးသွားပြီး ဝမ်းတွင်းဆေးရုံအတွင်း ဝင်ရောက်သွားကြောင်း ဒေသခံအချို့က ပြောသည်။
စစ်ကောင်စီတပ်ဖွဲ့ဝင် ၇ ဦးလိုက်ပါလာသော ယာဥ်မှာ ရှေ့ခန်းမှန်ချကာ ရှေ့နှစ်ယောက်၊ နောက်ငါးယောက် လိုက်ပါလာသည်ဟု ဆိုသည်။
Public Service Announcement
“မိုင်းနှစ်လုံးနဲ့ ပဒေသာမိုင်းဆွဲလိုက်တာ ကားကထိုးရပ်သွားတာ။ ၁မိနစ်လောက်နေတော့မောင်းပြေးသွားတာ။ ရှေ့ကားခေါင်းထဲကကောင်တွေကတော့သိပ်ဒဏ်ရာမရနိုင်ဘူး၊ မှန်တော့ကွဲသွားတယ်။ မိုင်းဘက်ကတစ်ယောက်ကတော့ ဒဏ်ရာရနိုင်တယ်။ နောက်ကငါးယောက်ကတော့ ကားကနောက်ပွင့်ဆိုတော့ အနည်းဆုံး သုံးယောက်ကတော့ သေမှာပါ။”ဟု ဝမ်းတွင်းမြို့နယ် တော်လှန်ရေးအင်အားစု(WTRF) တာဝန်ရှိသူက ပြောသည်။
ညပိုင်းတွင် သဲတော(၃)၊ အောင်ချမ်းသာတောင်ပိုင်းရပ်ကွက်တွင် အိမ်ထောင်စုစာရင်း၀င်စစ်ပြီး ပြည်သူအချို့အား ဖမ်းဆီးသွားကြောင်း ဒေသခံများက ပြောသည်။
