နိုင်ငံတကာကုမ္ပဏီများစွန့်ခွာသွား​သောရဲတံခွန်သဘာဝဓါတ်​ငွေ့စီမံကိန်းတွင်လုပ်ကိုင်လို​​သောကုမ္ပဏီများကို စစ်​ကောင်စီ​ဖိတ်​ခေါ်

●ထိုင်း​ရေနံကုမ္ပဏီက ပြည်တွင်းဘဏ်တစ်ခုကို အမည်ခံလွှဲ​ပြောင်းပူး​ပေါင်းလုပ်ရန်စီစဥ်​နေဟုသတင်းထွက်​ပေါ်​

နိုင်ငံတကာကုမ္ပဏီများစွန့်ခွာသွားသည့် ရဲတံခွန်သဘာဝဓာတ်ငွေ့တူးဖော်ရေးစီမံကိန်းကိုဆက်လက်လုပ်ကိုင်လိုသည့် ကုမ္ပဏီများအား ဖိတ်ခေါ်ကြောင်းအာဏာသိမ်း စစ်ကောင်စီက ကြေညာလိုက်သည်။

အဆိုပါစီမံကိန်းသည့် မုတ္တမကမ်းလွန်ရှိ လုပ်ကွက်များဖြစ်သည့် M-12 ၊M-13နှင့် M-14တို့တွင်တည်ရှိ ပြီး ထိုစီမံကိန်းအတွက် စီမံကိန်းတခုလုံးကို ဦးဆောင်လည်ပတ်သူ တာဝန်ခံ အော်ပရေတာ သို့မဟုတ် ရှယ်ယာရှင်အဖြစ် ဆောင်ရွက်ရမည်ဟု စစ်ကောင်စီကဆိုသည်။

ထိုလုပ်ကွက်မှ ပြင်သစ်ကုမ္ပဏီ Total ၊ မလေးရှားကုမ္ပဏီ PETRONAS ၊ ထိုင်းအစိုးရပိုင် PTTEP ၊ ဂျပန်ထိပ်သီးရေနံကုမ္ပဏီ ENEOS တို့က နှုတ်ထွက်ပြီးနောက်အာဏာသိမ်းစစ်ကောင်စီက ကုမ္ပဏီအသစ်များကို ဖိတ်ခေါ်လိုက်ခြင်းဖြစ်သည်။

Public Service Announcement

စိတ်ဝင်စားသည့် ကုမ္ပဏီများကို မေ ၂၇ ရက် နောက်ဆုံးထားပြီး စိတ်ဝင်စားမှုဖော်ပြလွှာ(EOI ) တင်သွင်းရမည်ဟုဆိုသည်။

“တင်ဒါခေါ်တာဟန်ပြပါပဲ။ ထိုင်းရေနံကုမ္ပဏီက ဘဏ်လောကမှာနာမည်ကြီးနေတဲ့ ပြည်တွင်းကုမ္ပဏီတခုကို နာမည်ခံ လွှဲပြောင်းပြီး ပေါင်းလုပ်ဖို့ စီစဉ်နေတာပါ”ဟု စွမ်းအင်လုပ်ငန်းရှင်တစ်ဦးကပြောသည်။

အနောက်နိုင်ငံများ၏ စီးပွားရေးပိတ်ဆို့မူများကြောင့် စစ်ကောင်စီထိန်းချုပ်ထားသည့် MOGEနှင့် လက်တွဲလုပ်ဆောင်ရန် မလွယ်ကူသောကြောင့် ယခုလို့ မလိမ့်တပတ်ဆောင်ရွက်ခြင်းဖြစ်သည်ဟု ၎င်းကသုံးသပ်သည်။

ရဲတံခွန် တူးဖော်ထုတ်လုပ်ရေး လုပ်ငန်းကြီးသည် ၃ ဒဿမ ၂ ထရီလျံ ကုဗပေ ထုထည်ရှိသော သဘာဝဓာတ်ငွေ့သိုက်ဖြစ်ပြီး ၂၀၀၀ပြည်နှစ် တွင် စတင် ထုတ်ယူကာ တစ်နေ့လျင် ၂၀၀ မီလီယံပေ ကနဦး ထုတ်ယူနိုင်ကြောင်း သိရသည်။

မလေးရှားရေနံကုမ္ပဏီ Petronas က ၂၀၀၃ ခုနှစ်မှ စ၍ ရဲတံခွန်တွင် စတင်ပါဝင်ခဲ့ပြီး ပိုင်ဆိုင်မှု ၄၀ ဒဿမ ၉ ရာခိုင်နှုန်းရှိသည်။မြန်မာ့ရေနံနှင့်သဘာဝဓာတ်ငွေ့လုပ်ငန်းMOGEက ၂၀ ဒဿမ ၅၊ ENEOS ၏ လက်အောက်ခံကုမ္ပဏီကNippon Oil Explorationက၁၉ ဒဿမ၉၊PTTEPက ၁၉ ဒဿမ ၃ ရာခိုင်နှုန်း အသီးသီးပိုင်ဆိုင်သည်။

MOGEကို အီးယူက အရေးယူပိတ်ဆို့ပြီး ထိုစီမံကိန်းမှ နိုင်ငံခြားကုမ္ပဏီအားလုံး နှုတ်ထွက်ထားပြီးလည်းဖြစ်သည်။