ချောင်းဦးတွင်စစ်တပ်ကမီးရှို့ဖျက်ဆီးခဲ့​သော​နေအိမ်၆၀ကို မုံရွာတကသကတစ်အိမ်​ထောင်လျှင်ကျပ်​လေး​သောင်းကူညီ

စစ်ကိုင်းတိုင်း၊ ချောင်းဦးမြို့နယ်ရှိ အကြမ်းဖက်စစ်တပ်၏ မီးရှို့ဖျက်ဆီးခြင်းခံရသော အိမ်ထောင်စုများအားတစ်အိမ်ထောင်လျှင် ကျပ်လေးသောင်းနှုန်းဖြင့်အိမ်ခြေ ၆၀ကို ကူညီထောက်ပံ့ခဲ့ကြောင်း မုံရွာတက္ကသိုလ်ကျောင်းသားများ သမဂ္ဂက သတင်းထုတ်ပြန်သည်။

မုံရွာတက္ကသိုလ်ကျောင်းသားများ သမဂ္ဂအဖွဲ့ကအလှူရှင်အဖွဲ့တစ်ဖွဲ့၏ ထောက်ပံ့ကူညီမှုဖြင့်ချောင်းဦးမြို့နယ်ရှိကျေးရွာ ၂ရွာမှစစ်ဘေးရှောင် ပြည်သူအချို့နှင့်တွေ့ဆုံခဲ့သည်။

မီးရှို့ခံခဲ့ရသော အိမ်ထောင်စုများထံသို့ တစ်အိမ်ထောင်လျင် (၄၀၀၀၀) ကျပ်နှုန်းဖြင့် စုစုပေါင်း အိမ်ခြေ ၆၀ စာ ထောက်ပံ့ကူညီခဲ့ကြောင်း မုံရွာတက္ကသိုလ်ကျောင်းသားများ သမဂ္ဂက ယ​နေ့ခုတ်ပြန်အသိပေးသည်။

ပထမရွာတွင် အိမ်ခြေ (၄၁)အိမ်စာအတွက်ကျပ် ၁၆ သိန်း​ကျော်( ၁,၆၄၀,ဝ၀၀ )ကူညီထောက်ပံ့ခဲ့ပြီး ဒုတိယရွာတွင် အိမ်ခြေ (၁၉) အိမ်စာအတွက် ၇၆၀,၀၀၀ ပေးအပ်လှူဒါန်းကူညီပေးခဲ့ကြောင်း မုံရွာတက္ကသိုလ်ကျောင်းသားများ သမဂ္ဂက ပြောသည်။

Public Service Announcement

“ချောင်းဦးမြို့နယ်ထဲမှာဆိုရင် စကစ နဲ့ ပျူတွေနဲ့ ပူးပေါင်းပြီး ပြည်သူတွေကို အကြမ်းဖက်ဖမ်းစီး သတ်ဖြတ်တာတွေ၊ နေအိမ်တွေကို မီးရှို့ဖျက်​ဆီးတာတွေကို ဒီနှစ်ကာလ အစောပိုင်းကာလကနေစပြီး ဒီနေ့ ဒီအချိန် အထိ ပြုလုပ်နေတာဖြစ်တယ်။ ပြည်သူတွေဟာလည်းအဲဒီဒုက္ခဆိုးတွေကို အကောင်းဆုံးခါးဆီးခံရင်းတော်လှန်ရေးကိုဆက်လုပ်နေကြတယ်ဖြစ်တယ်၊ကျနော်တို့ ပြည်သူတွေအနေနဲ့ ဒီလိုဒုက္ခသည်တွေကို အားပေးကူညီသင့်ပါတယ်။”ဟုမုံရွာတက္ကသိုလ်ကျောင်းသားများ သမဂ္ဂအဖွဲ့က ပြောသည်။

အကြမ်းဖက်စစ်တပ်က အာဏာသိမ်းပြီး ၁၅ လတာကာလအတွင်း စစ်ကိုင်းတိုင်းရှိ ကျေးရွာများမှ နေအိမ် ၁၃,၈၀၀ ကျော်မီးရှို့ဖျက်ဆီးခဲ့ကြောင်း Data for Myanmar က ဖော်ပြထားသည်။ ဧပြီလကုန်ပိုင်းအထိ အိမ်ခြေ ၇,၅၀၀ ကျော် မီးရှို့ဖျက်ဆီးခဲ့ပြီး မေလတစ်လတည်းတင်စစ်တပ်က အိမ်ခြေ ၆,၃၀၀ ကျော် မီးရှို့ဖျက်ဆီးခဲ့သည်။