မြန်မာစစ်ကောင်စီကို အာဆီယံကာကွယ်ရေးဝန်ကြီးများအစည်းအဝေး(ADMM)မှ ဖယ်ထုတ်ရန် Justice For Myanmar က တောင်းဆိုသည်။
အာဆီယံသည် လက်ရှိအချိန်အထိ စစ်ကောင်စီ၏ ပါဝင်မှုကို ခွင့်ပြုထားခြင်းသည် လွန်စွာမှားယွင်းသည့် လုပ်ရပ်ဖြစ်ပြီး အရေးယူဆောင်ရွက်ရန် အကြိမ်ကြိမ်ပျက်ကွက်နေရုံသာမက မြန်မာစစ်တပ်ကို ပံ့ပိုးကူညီနေခြင်းက စစ်တပ်ကျူးလွန်သော ရာဇဝတ်မှုများတွင် ကြံရာပါ ပတ်သက်နေ ခြင်းဖြစ်ကြောင်း JFM က ထုတ်ပြန်သည်။
“မြန်မာစစ်ကောင်စီက ဒီမိုကရေစီနည်းကျပြည်သူလူထုရဲ့ အသိအမှတ်ပြုတာမရှိပဲ အစိုးရတစ်ရပ်အဖြစ် သူတို့ဘာသာ စိတ်ထင်တိုင်းဖွဲ့စည်းထားတဲ့ တရားမဝင်အဖွဲ့အစည်းတစ်ရပ်သာ ဖြစ်ပါတယ်။ သူတို့အနေနဲ့ မြန်မာနိုင်ငံအပေါ် ထိန်းချုပ်နိုင်စွမ်းမရှိဘဲ၊ ကုလသမဂ္ဂစင်မြင့်မှာလည်း မြန်မာနိုင်ငံအပေါ် ကိုယ်စားပြုခွင့် မရှိပါဘူး” ဟု JFM က ဆိုသည်။
ထို့အတွက် လာမည့် ဇွန်လ ၂၂ တွင် ကျင်းပမည့် ADMM အစည်းအဝေးအပါအဝင် အာဆီယံ၏ အစည်းအဝေးနှင့် လှုပ်ရှားမှုအားလုံးမှ မြန်မာစစ်ကောင်စီကို ဖယ်ရှားရန်၊ အမျိုးသားညီညွတ် ရေးအစိုးရ NUG ကို အသိအမှတ်ပြုရန်၊ NUG နှင့် ပူးပေါင်းဆောင်ရွက်ရန် JFM က တောင်းဆိုသည်။
Public Service Announcement
ဆက်လက်ပြီး မြန်မာစစ်တပ်၏ အကြမ်းဖက်မှုများ အဆုံးသတ်ရန် ထိရောက်သည့် အရေးယူ ဆောင်ရွက်ချက်များ လုပ်ဆောင်ရန်၊ အာဆီယံ၏ ဒဏ်ခတ်ပိတ်ဆို့အရေးယူမှုဆိုင်ရာ မူဘောင် တစ်ရပ် ဖော်ဆောင်ရန်၊ လက်နက်ပိတ်ဆို့ရေးအပါအဝင် စစ်ခေါင်းဆောင်များကို နိုင်ငံတကာ ရာဇဝတ်ခုံရုံးသို့လွှဲပြောင်းရေး ကုလသမဂ္ဂလုံခြုံရေးကောင်စီနှင့်ပူးပေါင်းရန် အချက်များကို တောင်းဆိုသည်။
