စစ်ကောင်စီတပ်က ဆောမြို့နယ် အကြည်ရွာရှိ သောက်ရေတွင်းများအတွင်းလက်နက်ကြီးကျည်များ ပစ်ချထားခဲ့

အကြမ်းဖက်စစ်ကောင်စီသည် ဒေသခံပြည်သူများအသုံးပြုနေသော သောက်သုံးရေတွင်းများအတွင်း အသုံးမပြုရသေးသော လက်နက်ကြီးကျည်များ ပစ်ချထားမှုများပြုလုပ်ခဲ့ကြောင်း ဆောဒေသခံသတင်းရင်းမြစ်များက ပြောသည်။

ဆောမြို့နယ် အကြည်ကျေးရွာမှ ဒေသခံပြည်သူများသည် ရေတွင်းများမှ ရေကိုသောက်သုံးကြရာ ဗိုက်နာခြင်း၊ဝမ်းပျက်၊ဝမ်းရှောခြင်းများဖြစ်ပေါ်လာပြီး ရေမသန့်ခြင်းကြောင့်ဟုယူဆ၍ ယမန်နေ့(ဇွန် ၂၁ရက်)တွင် ရေတွေအားပက်၍တွင်းသန့်ရှင်းရေးလုပ်ရာ လက်နက်ကြီးကျည်များတွေ့ရှိခဲ့ရခြင်းဖြစ်သည်။

“ဒါက ပြည်သူလူထုကို ဒုက္ခပေးတဲ့ စခ တွေရဲ့ ထူးခြားတဲ့ နောက်နည်းလမ်းတစ်ခုပါ။ဒါကြောင့်
ကိုယ့်ဒေသကို ပြန်ဝင်ရောက်တဲ့အခါ ဒေသခံကာကွယ်ရေးတပ်ဖွဲ့တွေရဲ့ နယ်မြေ ရှင်းလင်းရေးတွေကို ပူးပေါင်းဆောင်ရွက်ဖို့လိုတယ်”ဟု ဆောဒေသ စစ်ရေးစောင့်ကြည့်သူက People’s Springသို့ ပြောသည်။

ကျေးရွာရှိ သောက်သုံးရေတွင်းထဲသို့ လက်နက်ကြီးကျည်များထည့်သွင်းခဲ့သည့် စစ်ကောင်စီတပ်သည် မေလ၂၂ရက်က စခဲ့သည့် ကျောက်ထု-ပခုက္ကူမြို့ စစ်ကောင်စီကားတန်းအပြန် လုံခြုံရေးကင်းယူခဲ့သည့်အဖွဲ့ဖြစ်ကြောင်း သိရသည်။

Public Service Announcement

မေလ နောက်ဆုံးပတ်ကစ၍ မကွေးတိုင်း၊ ယောဒေသ(ဂန့်ဂေါ၊ကျော၊ထီးလင်း၊ဆောနှင့်ကျောက်ထု) မြို့နယ်တို့တွင် အကြမ်းစစ်ကောင်စီတပ်က အင်အားအများအပြား တိုးချဲ့ခဲ့သည်။

လက်ရှိ ရက်သတ္တပတ်အတွင်း ဂန့်ဂေါ နှင့် ထီးလင်းမြို့နယ်တို့တွင် စစ်ကောင်စီတပ်က စစ် ကြောင်းသုံးခုဖြင့် ထိုးစစ်ဆင်လျှက်ရှိကြောင်းလည်း ဒေသခံသတင်းရင်းမြစ်များက ပြောသည်။