စစ်ကိုင်းတိုင်း၊ မုံရွာခရိုင်အခြေစိုက် BDSTF အဖွဲ့က ဘုတလင်မြို့ရဲစခန်းနှင့် မြို့နယ်အထွေထွေအုပ်ချုပ်ရေးမှူးရုံးအား လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း အနောက်မြောက်တိုင်းမဟာမိတ် PDF တပ်ပေါင်းစုက သတင်းထုတ်ပြန်သည်။
ဇွန်လ ၁၉ရက် ည ၉နာရီဝန်းကျင်က Balck Dragon Special Task Forceအဖွဲ့သည် ကနောင် People Defence Force နှင့် ပူးပေါင်း၍ ဘုတလင်မြို့ ရဲစခန်း နှင့် ထွေအုပ်ရုံးတို့အား (၉၀)မမဖြင့် (၂)လုံး၊ (၆၀) မမဖြင့် (၄)လုံး၊ (၇)မမ လောင်ချာ ခုနစ်လုံးဖြင့် (၃)ဖွဲ့ခွဲကာ ပစ်ခတ်တိုက်ခိုက်ခဲ့ကြောင်း အနောက်မြောက်တိုင်း မဟာမိတ် PDF တပ်ပေါင်းစု၏ ထုတ်ပြန်ချက်တွင် ဖော်ပြသည်။
အသေအပျောက်ရှိနိုင်ပြီး အထိအခိုက်အများအပြားရှိကြောင်း အနီးအနားရှိဒေသခံများထံမှ ကြားသိရသည်ဟု ဆိုသည်။
BDSTFအဖွဲ့သည် ဇွန်လ ၁၈ ရက် ည ၇မာရီခွဲဝန်းကျင်ကလည်း မုံရွာမြို့ ပညာရေးကောလိပ်ကျောင်းပေါက်တွင် ဘီယာသောက်ရင်း ဖုန်းကြည့်နေသော ကင်းစောင့်ရဲတစ်ဦးအား လက်ပစ်ဗုံးဖြင့် ဝင်ရောက်ပစ်ခတ်ခဲ့ပြီး ထိမှန်ခဲ့သည်ဟု ထုတ်ပြန်ချက်တွင် ဖော်ပြသည်။
Public Service Announcement
“နောက်ဆက်တွဲရလဒ်အခြေအနေအသေးစိတ်ကို မသိရှိရသေးပါဘူးဗျ။”ဟု အနောက်မြောက်တိုင်း မဟာမိတ် PDF တပ်ပေါင်းစု၏ တာဝန်ရှိသူက ပြောသည်။
ဘုတလင်မြို့နယ်တွင် အကြမ်းဖက်စစ်တပ်သည် ကျေးရွာများအား ဝင်ရောက်စီးနင်းမီးရှို့ဖျက်ဆီးခြင်းများပြုလုပ်နေပြီး ဒေသခံရာချီထွက်ပြေးတိမ်းရှောင်နေရကြောင်း ဒေသခံများက ပြောသည်။
