စစ်ဆေးရေးဂိတ်မိုင်းဆင်ထားရာ ပြည်သူများအားလူသားဒိုင်းအသုံးပြုထား၍ မစ်ရှင်ဖျက်သိမ်းခဲ့သော်လည်း စစ်ကောင်စီတပ်စိန်ခေါ်သောကြောင့် မိုင်းထပ်ခွဲ

စစ်ကိုင်းတိုင်း ကန့်ဘလူမြို့နယ်ရှိ စစ်ဆေးရေးဂိတ်တစ်ခုတွင် မိုင်းများဆင်ထားရာ စစ်ကောင်စီတပ်မှ ပြည်သူများအားဖမ်းဆီးပြီး လူသားဒိုင်းအသုံးပြုထားသောကြောင့် မစ်ရှင်ဖျက်သိမ်းခဲ့သော်လည်း စစ်တပ်မှစိန်ခေါ်သောကြောင့် အဝေးထိန်းမိုင်းဖြင့် ထပ်မံတိုက်ခိုက်ခဲ့ကြောင်း ရွှေဘိုခရိုင်တပ်ရင်း (၁၆) TRFက ထုတ်ပြန်သည်။

ဖြစ်စဥ်မှာ ယမန်နေ့(ဇူလိုင် ၁၂)နံနက် ၉ နာရီခန့်က ကန့်ဘလူမြို့နယ်တွင် စစ်ကောင်စီတပ်များကင်းစောင့်နေသည့်နေရာတစ်ခုတွင် မိုင်းများဆင်ထားရာ စစ်ကောင်စီတပ်မှ တွေ့ရှိသွားခဲ့သည်ဟု ဖော်ပြသည်။

ထို့နောက် ၎င်းတို့က ဝါဆိုလပြည့်နေ့ ဥပုသ်သီလဆောက်တည်ရန်ထွက်လာသော ဒေသခံပြည်သူ၄၀ ခန့်ကိုဖမ်းဆီးပြီး မိုင်းများအနီးဒူးတုပ်ထိုင်ခိုင်းကာ လူသာဒိုင်းအသုံးပြု၍ မိုင်းများဖြုတ်ယူခဲ့ခြင်းကြောင့် ပြည်သူများအားငဲ့ညှာပြီး မဖောက်ခွဲဘဲ မစ်ရှင်ဖျက်သိမ်းခဲ့ရသည်ဟု ဆိုသည်။

သို့သော် အကြမ်းဖက်စစ်ကောင်စီတပ်များသည် အဝေးထိန်းမိုင်း၌ဆင်ထားသော ဖုန်းဆင်းကဒ်ကိုထုတ်ယူကာ TRF တပ်ဖွဲ့ထံဆက်သွယ်ပြီး ‘မိုက်ရင်ထွက်ခဲ့’ဟု စိန်ခေါ်သောကြောင့် ကန့်ဘလူ ငါ့ရံ့ဒိုင်းရွာအနီး စစ်ဆေးရေးဂိတ်သို့ အင်အား ၂၀ခန့်ဖြင့်ရောက်လာသော စစ်ကောင်စီတပ်ကို အဝေးထိန်းမိုင်းဖြင့် တိုက်ခိုက်ခဲ့ခြင်းဖြစ်ကြောင်း တန့်ဆည်ထောက်ပို့တပ် TSO က ပြောသည်။

Public Service Announcement

အဆိုပါ တိုက်ခိုက်မှုကြောင့် စစ်ကောင်စီတပ်မှ ထိခိုက်သေဆုံးရှိနိုင်ပြီး တိုက်ခိုက်ခံရပြီးချိန်တွင် စစ်ကောင်စီတပ်မှ ၎င်းတို့လူများကို လိုက်ထရပ်တစ်စီး၊ လူနာတင်ယာဥ်တစ်စီးတို့ဖြင့် ကန့်ဘလူနယ် မှောတောရွာဘက် သယ် ဆောင်သွားကြောင်း TSO ထံမှ သိရသည်။

ရွှေဘိုခရိုင်တပ်ရင်း (၁၆)TRF မှထုတ်ပြန်ရာတွင်လည်း အထက်ပါတိုက်ခိုက်မှုအတွင်း စစ်ကောင် စီတပ်မှ ထိခိုက်သေဆုံးရှိခဲ့ပြီး အရေအတွက်အတိအကျ မသိရသေးဟု ဖော်ပြသည်။