မြိတ်မြို့ပေါ်တွင်စစ်ကောင်စီတပ်၏ ယာဥ်တစ်စီးကို မိုင်းဆွဲတိုက်ခိုက်ခဲ့ကြောင်း မြိတ်မြို့ပြည်သူ့ကာကွယ်ရေးတပ်ဖွဲ့က ယနေ့(ဇူလိုင် ၁၆)ထုတ်ပြန်သည်။
ယနေ့နံနက် ၇ နာရီခန့်က မြိတ်မြို့၊ ရေပုန်းရပ်ကွက် ဘုံပျံစာသင်ကျောင်းသို့ လုပ်အားပေးသန့်ရှင်းရေးလုပ်ရန်လာသော စစ်ကောင်စီတပ်သားများနှင့် ပျူစောထီးများလိုက် ပါလာသည့်ယာဥ်ကို မိုင်းဆွဲတိုက်ခိုက်ခဲ့ခြင်းဖြစ်ကြောင်း ဖော်ပြသည်။
“သေပျောက်ကတော့မရှိပါဘူး။ မိုင်းပေါက်ကွဲပြီးတော့စစ်ခွေး၊ ရဲခွေး၊ ပျူစောထီးနှင့် မီးသတ်အဖွဲ့က သေနတ်ကိုင်ပြီး ရှာဖွေမှုတွေလုပ်နေတယ်လို့သိရပါတယ်”ဟု မြိတ် (ပကဖ)မှ တာဝန်ရှိသူတစ်ဦးက ပြောသည်။
အထက်ပါတိုက်ခိုက်မှုကို နန်းထိုက်အောင်စစ်ဆင်ရေး၏ အစိတ်အပိုင်းတစ်ခုအဖြစ် အသိပေးထားပြီး ယခုကဲ့သို့မိုင်းဆွဲတိုက်ခိုက်မှုသည် မြိတ်(ပကဖ)၏လုပ်ရပ်သာဖြစ်ပြီး ဒေသခံပြည်သူများနှင့် လုံးဝသက်ဆိုင်ခြင်းမရှိကြောင်း ဖော်ပြသည်။
Public Service Announcement
ပြည်သူ့လူထုများအနေဖြင့် စစ်သား၊ ရဲနှင့် ပျူစောထီးအဖွဲ့များ၏ နီးစပ်ရာသို့ သွားလာခြင်းမပြုကြရန်နှင့်ခရီးသည်တင်ကားများ၊ အိမ်စီးကားများအနေဖြင့် စစ်ကား၊ ရဲကားများနှင့် အနီးကပ်သွားလာခြင်းမပြုကြရန်မြိတ်(ပကဖ)ကသတိပေးထုတ်ပြန်ထားသည်။
