စစ်ကိုင်းမြို့နယ်၊ ဒီပဲယင်းကွဲကျေးရွာကို အကြမ်းဖက်စစ်ကောင်စီတပ် ဝင်ရောက် စီးနင်းခံခဲ့ရသည့်ဖြစ်စဥ်တွင် ဒေသခံအမျိုးသားနှစ်ဦး မီးရှို့သတ်ဖြတ်ခံခဲ့ရကြောင်း ဒေသခံများက ပြောသည်။
စစ်ကောင်စီတပ်က ဇူလိုင်၂၂ ရက် နေ့လည် ၂နာရီမိနစ်၄၀ခန့်တွင် ဝင်ရောက်စီးနင်းခဲ့ခြင်းဖြစ်သည်။ ထို့နောက် အသက် ၃၇ နှစ်ခန့်အရွယ် ကိုဇော်လင်းဆိုသူအား မီးရှို့သတ်ဖြတ်ခဲ့ပြီး နေအိမ် သုံးလုံးကိုပါ မီးရှို့ဖျက်ဆီးခဲ့ကြောင်း၊ ထို့အပြင် ရွာသားတစ်ဦးကိုလည်း ရိုက်နှက်ပြီး သေနတ်နှင့်ပစ်ခတ်သတ်ဖြတ်သွားကြောင်း ဒေသခံများက ပြောသည်။
“သေဆုံးသူ နှစ်ယောက်ပါ။ ရွာသားနှစ်ယောက်မှာ တစ်ဦးကို မီးရိူ့သတ်ပြီး နောက်တစ်ဦးကို ရိုက်နှက်ပြီး ခေါင်းကိုသေနတ်နဲ့ပစ်သွားတာ။ လက်တွေခြေထောက်တွေကျိုးကြေနေတာ။ တော်တော်နှိပ်စက်ခံထားရတယ်။ ရွာရဲ့အားအထားရဆုံးလူတွေပါ။”ဟု နယ်ခံတစ်ဦးက ပြောသည်။
စစ်ကောင်စီတပ်သည် ဒီပဲယင်းကျေးရွာသို့ အင်အား ၁၀၀ခန့်ဖြင့် ဝင်ရောက်အကြမ်းဖက်ခဲ့ကြခြင်းဖြစ်ပြီး စစ်ကောင်စီတပ်ရန်ကြောင့် ရွာသူ၊ရွာသားများလည်း ထွက်ပြေးတိမ်းရှောင်ခဲ့ရသည်ဟု ဒေသခံများက ပြောသည်။
Public Service Announcement
မီးရှို့ခံရသည့်နေအိမ်များတွင် NLDအစိုးရလက်ထက် အုပ်ချုပ်ရေးမှူးဟောင်းနေအိမ်လည်းပါဝင်ကြောင်း၊ စစ်ကောင်စီတပ်ဖွဲ့သည် ညနေ ၅ နာရီခွဲခန့်တွင် ပြန်ထွက်သွားခဲ့ကြောင်း ဒေသခံများက ပြောသည်။
ဇူလိုင် ၂၂ရက်နံနက်ပိုင်းက ဒီပဲယင်းကွဲကျေးရွာအနီး၊ ကြွယ်ပုံကျေးရွာရှိ အကြမ်းဖက်စစ်တပ်နှင့်ပျူစခန်းအား PDFနှစ်ဖွဲ့က ဝင်ရောက်စီးနင်းတိုက်ခိုက်ခဲ့ကြောင်း၊ ထိုတိုက်ခိုက်ခံရမှုနှင့်ပတ်သက်၍ ဒီပဲယင်းကွဲရွာအား ဝင်ရောက်ဖျက်ဆီးခြင်းဖြစ်နိုင်ကြောင်း ဒေသခံအချို့က ပြောသည်။
