ကရင်အမျိုးသားအစည်းအရုံး(KNU) တပ်မဟာ(၅)နယ်မြေ ဖာပွန်ခရိုင်အတွင်း၌ ယခု ဩဂုတ်လ ဝက်အတွင်း တိုက်ပွဲ ၅၃ ကြိမ်ဖြစ်ခဲ့ပြီး စစ်ကောင်စီတပ်နှင့် နယ်ခြားစောင့်တပ်(BGF) တပ်ဖွဲ့ဝင် ၄၃ ဦး သေဆုံးကာ ၁၇ ဦး ဒဏ်ရာရရှိခဲ့ သည်ဟု KNU တပ်မဟာ(၅)က ထုတ်ပြန်သည်။
ဩဂုတ် ၁ရက်မှ ၁၅ရက်နေ့အထိ ကရင်အမျိုးသားလွတ်မြောက်ရေးတပ်မတော် (KNLA)နှင့် စစ်ကောင်စီ၊ BGF တပ်တို့အကြား တိုက်ပွဲဖြစ်ပွားခဲ့မှုများကို ဖော်ပြခဲ့ခြင်းဖြစ်သည်။
အဆိုပါ တိုက်ပွဲများအတွင်း KNLA တပ်ဖွဲ့ဝင်တစ်ဦး ကျဆုံးခဲ့ပြီး ထိခိုက်ဒဏ်ရာ ရမှုမရှိဟု အသိပေးထားသည်။
တိုက်ပွဲများဖြစ်ပွားစဉ် နယ်မြေကျူးကျော်စစ်ရေးလှုပ်ရှားနေသည့် အကြမ်းဖက်စစ်ကောင်စီတပ်၊ ၎င်းခါးပိုက်ဆောင်နယ်ခြားစောင့်တပ်(BGF) တို့က ကျေးရွာနှင့် လယ်ယာ၊ ဉယာဉ်ခြံမြေများအတွင်းသို့ ရည်ရွယ်ချက်ရှိစွာဖြင့် ပစ်ခတ်ခဲ့၍ အရပ်သား ပြည်သူနှစ်ဦး ဒဏ်ရာရခဲ့သည်ဟု ဆိုသည်။