ဒေါ်လာရငွေများကို ကျပ်ငွေပြောင်းလဲခွင့် ကင်းလွတ်သည့် ကုမ္ပဏီ/လူပုဂ္ဂိုလ်များသည် နိုင်ငံခြားသို့ ဒေါ်လာငွေလွှဲရာတွင် စစ်ကောင်စီ၏ ခွင့်ပြုချက်ရယူရမည်ဟုစစ်ကောင်စီဗဟိုဘဏ်က တစ်ရက်အတွင်းပြောင်းလဲထုတ်ပြန်သည်။
အဆိုပါ ကုမ္ပဏီ၊လူပုဂ္ဂိုလ်များ၏ ရငွေဒေါ်လာများကို နိုင်ငံခြားသို့ငွေလွှဲပါက စစ်ကောင်စီ၏ ခွင့်ပြုချက်ရယူရန်မလိုကြောင်း ဩဂုတ် ၁၅ ရက်တွင် ကြေညာခဲ့ပြီး၊ တစ်ရက်အကြာတွင် ထိုထုတ်ပြန်ချက်ကို ပြန်လည် ပယ်ဖျက်ကြောင်း ထုတ်ပြန်ခဲ့ခြင်းဖြစ်သည်။
ဒေါ်လာမှ ကျပ်ငွေကို ပြောင်းလဲ ကင်းလွတ်ခွင့်ပြုသည့် ကုမ္ပဏီများ၊ လူပုဂ္ဂိုလ်များအနေဖြင့် ဒေါ်လာကို နိုင်ငံဖြတ်ကျော်ငွေပေးချေရာတွင်လည်း စစ်ကောင်စီ၏ ခွင့်ပြုချက်ရယူရန်မလိုအပ်တော့ကြောင်း၊ ကင်းလွတ်ခွင့်ရသည့် ကုမ္ပဏီများ၊ လူပုဂ္ဂိုလ်များထံမှ ဝယ်ယူသူများသည်လည်း နိုင်ငံဖြတ်ကျော်ငွေပေးချေမှုကိုလည်း စစ်ကောင်စီ၏ ခွင့်ပြုချက်မလိုတော့ကြောင်း စစ်ကောင်စီက သြဂုတ် ၁၅ နေ့စွဲဖြင့် ထုတ်ပြန်ခဲ့ခြင်းဖြစ်သည်။ ထိုထုတ်ပြန်ချက်ကို ဩဂုတ် ၁၆ ရက်တွင်ပြန်လည်ပြင်ဆင်လိုက်ခြင်းဖြစ်သည်။
“အရင်က ကိုယ်တိုင်သုံးသုံး၊ဘာလုပ်လုပ်ကြိုက်တာလွတ်လွတ်လပ်လပ်လုပ်။ ဒီနေ့ကျတော့ ကိုယ့်သဘောနဲ့မလုပ်နဲ့ဦး ငါတို့ ခွင့်ပြုမှလုပ်။ အရင်ရက်က မှားသွားလို့ဆိုတဲ့သဘောပါ။ တော်တော် ရီစရာကောင်းတဲ့ အမိန့်တွေ”ဟု ရန်ကုန်အခြေစိုက်ပို့ကုန်လုပ်ငန်းရှင်တစ်ဦးကပြောသည်။
Public Service Announcement
လက်ရှိတွင် ထိုသို့ အမိန့်၊ ညွန့်ကြားချက်များ မတည်ငြိမ်ခြင်းကြောင့် လုပ်ငန်းများ လုပ်ကိုင်ရန် ခက်ခဲနေပြီး လုပ်ငန်းများရပ်ဆိုင်းထားရသည်ဟုလည်း ၎င်းကဆက်ပြောသည်။
“ဗရမ်းဗတာအမိန့်တွေထုတ်ပြီးလုပ်နေကတည်းက သူတို့မှာ ငွေကြေးမူဝါရာဆိုင် အတွေ့အကြုံ ဗဟုသုတမရှိဘူးဆိုတာ ပေါ်လွင်နေတယ်။ ဒေါ်လာနဲ့ပတ်သတ်ပြီး စစ်ကောင်စီအတွက် ကူရာကယ်ရာမဲ့နေတယ်ဆို သိသာနေတယ်”ဟု ဘဏ္ဍာရေးဝန်ဆောင်မှုလုပ်ငန်းဆောင်ရွက်နေသည့် ကုမ္ပဏီတခုမှ ဒါရိုက်တာတစ်ဦးကပြောသည်။
ထိုအပြင် စစ်ကောင်စီက ပို့ကုန်လုပ်ငန်းများ၏ရငွေ ဒေါ်လာ ၆၅ ရာခိုင်နှုန်းကို တစ်ဒေါ်လာ ၂၁၀၀ကျပ်ဖြင့် နေ့ခြင်းပြီး ကျပ်ငွေပြောင်းရမည်ဟုဖိအားပေးထားသည်။ ကျန် ၃၅ ရာခိုင်နှုန်းကိုမူ တစ်လအတွင်း သုံးစွဲနိုင်ပြီး နိုင်ငံခြားသို့ ငွေလွှဲပါက စစ်ကောင်စီ၏ ခွင့်ပြုချက်ကို ရယူရမည်ဟု ဆိုထားသည်။ ၆၅ ရာခိုင်းနှုန်းကို ရောင်းချခြင်းနှင့် ဝယ်ယူသူအတွက်လည်း ကန့်သတ်ချက်များစွာ ထုတ်ပြန်ထားသည်။
စစ်ကောင်စီဗဟိုဘဏ်က ဧပြီ ၃ ရက် တစ်ဒေါ်လာကို ၁၈၅၀ကျပ် သတ်မှတ်ထားပြီး ဩဂုတ် ၅ ရက်တွင် တစ်ဒေါ်လာကို ၂၁၀၀ကျပ်ဖြင့်ပြောင်းလဲသတ်မှတ်ခဲ့သည်။
စစ်ကောင်စီက ဒေါ်လာလိုအပ်ချက်ဖြည့်တင်းရန် ပြည်တွင်းရှိ ကုမ္ပဏီများနှင့် လူပုဂ္ဂိုလ်များ၏ နိုင်ငံခြားငွေစာရင်းမှ ဒေါ်လာများကို ဧပြီ ၄ ရက်က တစ်ဒေါ်လာကို ၁၈၅၀ကျပ်ဖြင့် တရက်အတွင်းရောင်းချရမည်ဟု ဖိအားပေးခဲ့သည်။
သို့သော်စစ်ကောင်စီ၏ မတည်ငြိမ်ဘဲ အမျိုးမျိုးပြောင်းလဲနေသော ညွန်ကြားချက်များကြောင့် ဒေါ်လာဈေးမှာ ပိုမိုလှုပ်ခတ်နေပြီးလက်ရှိပြည်တွင်းငွေကြေးဈေးကွက်တွင် တစ်ဒေါ်လာကို ကျပ်၃၀၀၀ ကျော်အထိ့စံချိန်တင်ဈေးတက်ခဲ့ခြင်းဖြစ်သည်။
