မကွေးတိုင်း၊ ရေစကြိုမြို့နယ်၊ ငတရော်ကျေးရွာကို အကြမ်းဖက်စစ်ကောင်စီ တပ်က နှစ်ရက်ဆက်တိုက် မီးရှို့ဖျက်ဆီးနေပြီး ရွာလုံးကျွတ်နီးပါး မီးလောင် ကျွမ်းပျက်စီးနိုင်ကြောင်း ဒေသခံများက ပြောသည်။
စစ်ကောင်စီတပ်သည် ယမန်နေ့(သြဂုတ် ၁၇ရက်) နံနက်၁၀ နာရီခန့်မှစတင်ကာ အိမ်ခြေ ၆၀၀ ခန့်ရှိသော ငတရော်ကျေးရွာအတွင်းသို့ ဝင်ရောက်ကာ နေအိမ်များအား မီးရှို့ဖျက်ဆီးခဲ့သည်။
ယမန်နေ့က တစ်နေကုန်မီးလောင်ကျွမ်းခဲ့ပြီး ညပိုင်းအထိ ဆက်လက်လောင်ကျွမ်းကာ နေအိမ်အများအပြား ပျက်စီးခဲ့ကြောင်း၊ ထို့အပြင် ယနေ့(သြဂုတ်၁၈ရက်)နံနက်ပိုင်းတွင်လည်း စစ်ကောင်စီတပ်က ကျန်နေသေးသည့်အိမ်များအား မီးရှို့ဖျက်ဆီးနေကြောင်း ဒေသခံများက ပြောသည်။
စစ်ကောင်စီတပ်သည် ကျေးရွာအတွင်း ရှိနေဆဲဖြစ်၍ ဝင်ရောက်မီးငြှိမ်း သတ်နိုင်ခြင်းမရှိဘဲ ရွာသူရွာသားများလည်း ထွက်ပြေးတိမ်းရှောင်နေရသည်။
Public Service Announcement
ယမန်နေ့(ဩဂုတ် ၁၇ ရက်)နံနက် ၉နာရီဝန်းကျင်က ရေယှားကျေးရွာမှ ငတရော်ကျေးရွာသို့ စစ်ကြောင်းနှစ်ကြောင်းခွဲတက်လာသော အင်အား (၆၀)ကျော်ပါ စစ်အုပ်စုအား ဒေသတွင်း ပူးပေါင်းမဟာမိတ်အဖွဲ့များမှ ငတရော်ရွာခြေအရောက်တွင် အနီးကပ်ပစ်ခတ်တိုက်ခိုက်ခဲ့သည်။
စစ်အုပ်စုဘက်က ရှစ်ဦးခန့်သေဆုံးနိုင်ပြီး ရဲဘော်တစ်ဦးလည်း မစိုးရိမ်ရ ဒဏ်ရာရရှိခဲ့ကြောင်း ရေစကြို PDF အဖွဲ့က ထုတ်ပြန်ထားသည်။
