အလောင်းတော်ကဿပနယ်မြေရှိ ရွာနှစ်ရွာကို စစ်ကောင်စီတပ် မီးရှို့ဖျက်ဆီးပြီး ဒေသခံငါးဦးကို သတ်ဖြတ်

စစ်ကိုင်းတိုင်း ယင်းမာပင်မြို့နယ်၊ အလောင်းတော်ကဿပနယ်မြေရှိ ကပိုင်ကျေးရွာနှင့်သီးကုန်းကျေးရွာကို အကြမ်းဖက်စစ်ကောင်စီတပ်က မီးရှို့ဖျက်ဆီးခဲ့၍ နေအိမ်အဆောက်အအုံ ၁၀၀ ကျော် မီးလောင်ပျက်စီးခဲ့ပြီး ဒေသခံပြည်သူ ငါး ဦး သတ်ဖြတ်ခံခဲ့ရကြောင်း ဒေသတွင်းသတင်းရင်းမြစ်များက ပြောသည်။

စစ်ကောင်စီတပ်သည် သြဂုတ် ၁၈ ရက် ညနေ ၃ နာရီခန့်မှ သြဂုတ်၂၀ ရက်အထိ ယင်းမာပင်မြို့နယ်၊ ကပိုင်ရွာနှင့်သီးကုန်းရွာကိုမီးရှို့ဖျက်ဆီးခဲ့ရာ အိမ်ထောင်စု ၁၂၁စုခန့် မီးလောင်ဆုံးရှူံးခဲ့ကြောင်း၊ အိမ်ထောင်စု တစ်စုလျှင် လူနေအိမ်၊မီးဖိုဆောင်နှင့် သီးနှံသိုလှောင်ရုံအပါအဝင် အဆောက်အဦး သုံးခုအနည်းဆုံး မီးလောင်ပျက်စီးခဲ့​ကြောင်း ယင်းမာပင်မြို့နယ်သတင်းမှန်ပြန်ကြားရေးက သတင်းထုတ်ပြန်သည်။

စစ်ကောင်စီတပ်သည် မီးရှို့ဖျက်ဆီးရုံမက ကပိုင်ကျေးရွာနှင့် သီးကုန်းကျေးရွာရှိ ဒေသခံပြည်သူ ငါးဦးကိုပါ သတ်ဖြတ်ခဲ့ကြောင်း ယင်းမာပင်မြို့နယ်သတင်းမှန်ပြန်ကြားရေးက အသိပေးသည်။

အဆိုပါ မီးလောင်ဆုံးရှုံးမှုတွင် ပြည်သူများ၏ ​​နေအိမ်အဆောက်အအုံများအပြင် တောင်သူလုပ်ငန်းသုံး လယ်ယာသုံးစက်ပစ္စည်းများ၊ မီးစက် ရေစက်များပါ မီးလောင်ပျက်စီးခဲ့ရကြောင်း ဒေသခံများက ပြောသည်။

Public Service Announcement

စစ်ကောင်စီတပ်များသည် ရင်ပေါင်တိုင်ရွာဖြစ်စဥ်မှ အကြမ်းဖက်စစ်အုပ်စုများဖြစ်ပြီး အင်အား၂၀၀ ခန့်ပါရှိကာ ယနေ့(သြဂုတ်၂၂ရက်) တွင် ယင်းမာပင်မြို့နယ် သလောက်ကျေးရွာနှင့် ဝန်းကုန်းကျေးရွာအနီးသို့ ရောက်ရှိနေကြောင်း ဒေသခံများက ပြောသည်။