မြန်မာစစ်တပ်ကို ICCတွင်တရားစွဲရန် အမရီကန်အစိုးရကထောက်ခံကြောင်းထုတ်ပြန်ချက်ကြောင့်ဒေါ်လာနှင့်ရွှေဈေးခုန်တက်ဟုလုပ်ငန်းရှင်ပြော
ပြည်တွင်းဈေးကွက်တွင်တစ်ဒေါ်လာလျှင်ယနေ့(သြဂုတ် ၂၅ရက် )ကျပ် ၃၁၀၀နှင့် ရွှေတစ်ကျပ်သားလျှင် ကျပ် ၂၈သိန်းကျော်အထိဈေးတက်လာကြောင်းဈေးကွက်အတွင်းမှသိရသည်။
ဩဂုတ်၁၃ ရက်တွင်တစ်ဒေါ်လာလျှင် ၃၀၀၀ ကျပ်အထိစံချိန်တင်ဈေးတက်ခဲ့ပြီးနောက် စစ်ကောင်စီက ဒေါ်လာဝယ်ရောင်အချို့ကိုဖမ်းခြင်း၊ဖမ်းဆီးမည်ဟု ခြိမ်းခြောက်ပြီးနောက် ၃၀၀၀ ကျပ်အောက်ခေတ္တပြန်ကျခဲ့သည်။ထိုနောက်ယခုရက်ပိုင်းဆက်တိုက်ဈေးတက်လာရာ ယနေ့တွင် ၁ ဒေါ်လာ ၃၁၀၀ ကျပ်ဈေးအထိ့ဘယ်တုန်းကမျှမရောက်ဖူးသောနှုန်းသို့ မြင့်တက်လာကာ ၊ကျပ်ငွေတန်ဖိုးထပ်မံစံချိန်တင်ကျဆင်းခဲ့ခြင်းဖြစ်သည်။
ရွှေဈေးမှာ တစ်ကျပ်သားလျှင် ၂၈ သိန်ကျော်(၂,၈၁၀,၀၀၀)အထိဈေးတက်လာသည်ဟု ဈေးကွက်အတွင်းမှာ သိရသည်။
“ဒီနေ့ညနေပိုင်းအထိ ဒေါ်လာလိုက်ဝယ်နေကြတယ်။ တချို့နေရာတွေမှာ တစ်ဒေါ်လာ ၃၂၀၀ကျပ်အထိ ပေါက်ဈေးရှိတယ်”ဟု ဒေါ်လာအရောင်းအဝယ်လုပ်သူတစ်ဦးကပြောသည်။
ဒေါ်လာဈေးသည် ယမန့်နေ့(သြဂုတ် ၂၃ရက်တွင်) တစ်ဒေါ်လာလျှင် ၂၈၀၀ကျပ်မှ ၂၉၀၀ကျပ်အထိသာပေါက်ဈေးရှိခဲ့သော်လည်း ယနေ့ နေ့လယ်ပိုင်းမှ စတင်ပြီး တစ်ဒေါ်လာလျှင် ကျပ် ၃၁၀၀ကျော်အထိ တဟုန်းထိုးမြင့်တက်ခဲ့ခြင်းဖြစ်သည်။
“မနက်က စစ်ခေါင်းဆောင်တွေကို လူမျိူးသုဉ်းသတ်ဖြတ်မှုနဲ့ ICCမှ တရားဆွဲမယ်လို့ အမေရိကန်နဲ့ အနောက်နိုင်ငံတွေ ထုတ်ပြန်တာကြောင့် ဈေးကွက်ထဲမှာ ဒေါ်လာနဲ့ရွှေဝယ်တဲ့သူများလာ။ ဘယ်လောက်များလဲဆိုတော့ ညဘက်အထိ လိုက်ဝယ်နေကြတုန်း”ဟု ဒေါ်လာအရောင်းအဝယ်လုပ်သူတစ်ဦးကပြောသည်။
အမေရီကန်အစိုးရက ကုလလုံခြုံရေးကောင်စီကICC သို့တင်သွင်းသောစစ်တပ်ကိုတရားစွဲဆိုရန် အကြံပြုချက်ကိုလည်းထောက်ခံကြောင်းသြဂုတ် ၂၅ ရက်တွင်ထုတ်ပြန်သည်။
ထိုအပြင်ဒေါ်လာငွေစက္ကူအသစ်နှင့် နံပတ်စဉ်လိုက်ရှိသည့် ဒေါ်လာငွေစက္ကူထုတ်များမှာ ဈေးကွက်အတွင်း ကြိုက်ဈေးရနေသည်ဟု ဒေါ်လာအရောင်းအဝယ်လုပ်သူများကပြောသည်။
ပြည်တွင်းအခေါက်ရွှေဈေးမှာလည်း ယမန့်နေ့က တစ်ကျပ်သားလျှင် ၂၇ သိန်းခွဲခန့်သာရှိသော်လည်း ယနေ့နေ့လယ်ပိုင်းတွင် ၂,၈၁၀,၀၀၀ကျော်အထိမြင့်တက်လာသည်။
ဒေါ်လာနှင့်ရွေဈေးနှုန်းများ စံချိန်တင်မြင့်တက်နေသော်လည်းဈေးကွက်အတွင်း အခေါက်ရွှေတုံးများဝယ်ယူ၍မရကြောင်းလည်း ရွှေလုပ်ငန်းရှင်များကပြောသည်။
စစ်ကောင်စီ ဗဟိုဘဏ်က တစ်ဒေါ်လာလျှင် ကျပ် ၂၁၀၀နှင့် စစ်ကောင်စီထိန်းချုပ်ထားသည့် ရန်ကုန်တိုင်းရွှေလုပ်ငန်းရှင်အသင်းက အခေါက်ရွှေတစ်ကျပ်သား ၂,၀၆၂,၀၀၀ကျပ်သာ ဈေးဖွင့်ထားသည်။
လက်ရှိတွင် ဒေါ်လာနှင့်ရွှေမှာ ဝယ်လိုအားမနည်းသေးသောကြောင့် ဈေးဆက်လက်မြင့်တက်နိုင်သည်ဟု ဒေါ်လာနှင့်ရွှေအရောင်းအဝယ်လုပ်သူများကပြောသည်။