စစ်ကောင်စီတပ် မကြာခဏမီးရှို့ဖျက်ဆီးနေသည့် နှမ်းခါးရွာ အကူအညီများလိုအပ်နေ

မကွေးတိုင်း၊ ဂန့်ဂေါမြို့နယ်ရှိ နှမ်းခါးကျေးရွာတွင် စစ်ကောင်စီတပ်က မီးရှို့ဖျက်ဆီးထား၍ အကူအညီများလိုအပ်နေကြောင်း နှမ်းခါးရွာ ပြန်လည်ထူထောင်ရေးအဖွဲ့က ပြောသည်။

နှမ်းခါးကျေးရွာရှိ စစ်ဘေးရှောင်စာသင်ကျောင်း၊ နေအိမ် (၈)လုံးနှင့် နာရေးကားအပါအဝင် မော်တော်ယာဥ် (၆)စီး မီးလောင်ဆုံးရှုံးခဲ့ရကြောင်း ထုတ်ပြန်ထားသည်။

ပြီးခဲ့သည့် သြဂုတ် ၁၉ ရက်က နှမ်းခါးရွာအနီးတွင် အကြမ်းဖက်စစ်ကောင်စီတပ်နှင့် ဒေသတွင်း PDF အဖွဲ့များ ၂နာရီခွဲခန့်ကြာ တိုက်ပွဲဖြစ်ပွားခဲ့ရာ စစ်ကောင်စီတပ် အထိအခိုက်အကျအဆုံးများ ရှိခဲ့သည်။

စစ်ကောင်စီတပ် အထိနာ၍ နှမ်းခါးရွာရှိ စစ်ဘေးရှောင်စာသင်ကျောင်းနှင့် လူနေတဲ (၈)လုံးကိုလည်း မီးရှို့ဖျက်ဆီးခဲ့သည်။

Public Service Announcement

ထို့အပြင် အိမ်စီးကားတစ်စီး ၊ FAW ကား ၂စီး ၊ သုံးဘီး ၂စီးနှင့် ဖြူစင်မေတ္တာ နာရေးကားများကိုလည်း ဖျက်ဆီးခဲ့ပြီး စစ်ဘေးရှောင်များ၏ ဆိုင်ကယ်အချို့ကိုလည်း ရိုက်ထုဖျက်ဆီးခဲ့ကြောင်း၊ ကာလတန်ကြေး ကျပ်သိန်း၂,၀၀၀ ကျော် ဆုံးရှုံးခဲ့ရကြောင်း နှမ်းခါးရွာ ပြန်လည်ထူထောင်ရေးအဖွဲ့က ပြောသည်။

“စစ်ကောင်စီဘက်က မြန်မာနိုင်ငံနေရာအနှံ့ကို ပြာချလို့ ရပေမယ့် ပြည်သူတွေရဲ့ စိတ်ဓာတ်တွေကို ပြချလို့ မရနိုင်ပါ။ ပြည်သူတွေ အနေနှင့်လည်း နေရာအနှံ့ကို လိုက်လှူနေရတာသိပေမယ့်လည်း ဆက်ပြီးအလှူခံပါရစေ။ မီးရှို့ခံရသော လူနေတဲ ၈လုံးအတွက် ပြန်လည်ထူထောင်ရေး အဖွဲ့က ဆက်လက်အလှူခံပြီး ပံ့ပိုးသွားမည်ဖြစ်သောကြောင့် နိုင်ရာကနေ ကူညီပေးကြပါရန် အသိပေးပါသည်။”ဟု နှမ်းခါးရွာ ပြန်လည်ထူထောင်ရေးအဖွဲ့က မေတ္တာရပ်ခံထားသည်။

နှမ်းခါးရွာသည် အကြမ်းဖက်စစ်ကောင်စီတပ်၏ မကြာခဏ မီးရှို့ဖျက်ဆီးမှုများ ခံနေရသော ကျေးရွာတစ်ရွာဖြစ်သည်။