စစ်ကိုင်းမြို့နယ်၊ တောင်ကြားကျေးရွာတွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က လေကြောင်းမှ ပစ်ခတ်နေပြီး ကျေးရွာအတွင်းသို့လည်း ထပ်မံဝင်ရောက် ပစ်ခတ်ကာ မီးရှို့ဖျက်ဆီးနေကြောင်း သတင်းရရှိသည်။
ယနေ့ (သြဂုတ် ၃၁ရက်) နံနက် ၇နာရီခွဲခန့်က စစ်ကောင်စီတပ်များသည် တောင်ကြားရွာအား ထိတွေ့တိုက်ပွဲဖြစ်ပွားမှုမရှိဘဲ ဂျက်ဖိုက်တာလေယာဥ်ဖြင့် ပစ်ခတ်ခဲ့ကြောင်း၊ ထို့အပြင် မြေပြင်၌လည်း ကြွယ်ပုံရွာ၌ စခန်းချထားသည့် စစ်ကောင်စီတပ်နှင့် ပျူစောထီးများက ကျေးရွာအတွင်း ထပ်မံဝင်ရောက်မီးရှို့နေကြောင်း စစ်ကိုင်းမြို့နယ် သတင်းမှန်ပြန်ကြားရေးက အသိပေးသည်။
” လက်နက်ကြီးနဲ့ ၇ ချက်ထုတယ်။ တံတားဦးဘက်က တက်လာတဲ့ ဂျက်ဖိုက်တာနဲ့ နံနက် ၉:၄၂နာရီအချိန်မှာ ယခင်ရက်က တောင်ကြားရွာ တိုက်ပွဲဖြစ်ခဲ့တဲ့နေရာများကို ၆ ချက်ခန့်ပစ်ခတ်ခဲ့ပါတယ်။”ဟု စစ်ကိုင်းမြို့နယ် သတင်းမှန်ပြန်ကြားရေးက ပြောသည်။
စစ်အုပ်စုသည် အင်အား ၁၀၀ခန့်ရှိပြီး ဒေသခံပြည်သူအများအပြား ထွက်ပြေးတိမ်းရှောင်နေရသည်။
Public Service Announcement
စစ်ကောင်စီတပ်များနှင့် ပျူစောထီးများသည် ဩဂုတ် ၂၉ ရက်ကလည်း တောင်မြို့ကျေးရွာနှင့် တောင်ကြားရွာကို မီးရှို့ဖျက်ဆီးခဲ့ပြီး နှစ်ရွာပေါင်း အိမ်ခြေ ၁၆၇လုံး မီးလောင်ပျက်စီးခဲ့သည်။
