သန်လျင်မြို့ သေနတ်ပစ်ကွင်းတွင် စစ်ကောင်စီတပ်သားအချင်းချင်းပစ်ခတ်မှုဖြစ်ပြီး ခြောက်ဦးသေဟုဆို

ရန်ကုန်တိုင်း သန်လျင်မြို့နယ်၊ သေနတ်ပစ်ကွင်းတွင် စစ်ကောင်စီတပ်သားအချင်းချင်းပစ်ခတ်မှုဖြစ်ပြီး စစ်ကောင်စီတပ်သား ခြောက်ဦးသေဆုံးကြောင်း ဒေသခံသတင်းရင်းမြစ် Thanlyin Channel က ယနေ့(စက်တင်ဘာ ၁ ရက်) ထုတ်ပြန် သည်။

ဖြစ်စဥ်အရ ယမန်နေ့(သြဂုတ် ၃၁ ရက်) ည ၁၁ နာရီခန့်တွင် သန်လျင်မြို့ စစ်ပင်ကွင်းရွာ၏ တောင်ဘက်တွင်ရှိသော သေနတ်ပစ်ကွင်းတွင် ဖြစ်ပွားခဲ့ခြင်းဟု ဆိုသည်။

“အစောင့် စခ ၂ယောက်က စခ ၆ ကောင်ကို ပစ်သတ်သွားတယ်။ အဲဒီသေနတ်ပစ်ကွင်းနားမှာ သန်လျင်ရေတပ်က တက(တပ်ကြပ်) ဇော်မိုးဦး တဲရှိတယ်။ သူ့မိန်းမနဲ့ သမီးအကြီးပါပစ်သတ်သွားတယ်။ ကလေးတစ်ယောက်ဒဏ်ရာရ။ နောက်ကလေးတစ်ယောက်ပျောက်နေတယ်။ တပ်ကြပ် ဇော်မိုးဦးဒဏ်ရာရတယ်။ အလောင်းတွေလာသယ်သွားတယ်တဲ့” ဟု ဒေသခံပြည်သူများက ပြောကြားချက်ကို ကိုးကား၍ Thanlyin Channel က ဖော်ပြသည်။

လက်ရှိတွင် သန်လျင်မြို့နယ် ခြောက်လမ်းသွားလမ်းဆုံနှင့် ကုလာဝဲတံတား အတက်၊အဆင်း များကို အကြမ်းဖက်စစ်ကောင်စီက ပိတ်ဆို့စစ်ဆေးနေကြောင်း အသိပေးသည်။

Public Service Announcement

“အခု တင်ကျွန်တော့်ကား ဖြတ်တာ သန်လျင်တံတားကို ပိတ်ထားလို့ ပေးမသွားဘူး။စစ်ဆေး ပြီး ပြန်လှည့်ခိုင်းတယ်”ဟု သန်လျင်မြို့နယ် မင်းကျောင်းရပ်ကွက် နေသူတစ်ဦးက လူထုနွေဦးသို့ နံနက် ၁၀ နာရီခန့်တွင် ပြောသည်။

ထို့အပြင် သန်လျင်တံတားအဆင်း တိုင်ရင်းသားကျေးရွာအရှေ့၌လည်း အင်အားအပြည့်​ဖြင့် ပိတ်ဆို့စစ်မှုရှိကြောင်းလည်း သိရသည်။

စစ်ကောင်စီတပ်သားအချင်းချင်းပစ်ခတ်မှုကို လူထုနွေဦးအနေဖြင့် ထပ်မံအတည်ပြုနိုင်ရန် ဒေသခံများနှင့် ဆက်သွယ်နေဆဲ ဖြစ်သည်။

လက်ရှိ သန်လျင်မြို့နယ်အတွင်း စစ်ကောင်စီတပ်က မော်တော်ယာဥ် စုစုပေါင်း ၁၅ စီးခန့်ဖြင့် ကင်းလှည့်သွားလာနေသည်ဟု Thanlyin Channel က ဖော်ပြသည်။