ဒေါ်လာနှင့်​ရွှေ​ဈေးအတက်အကျကြမ်းပြီး​နောက် အ​ရောင်းအဝယ်ရပ်ဆိုင်း​

ဈေးကွက်အတွင်း ဒေါ်လာနှင့်ဒေါ်လာဈေးအတက်အကျကြမ်းနေပြီး လုပ်ငန်းပိုင်ရှင်တစ်ချို့ခြိမ်းခြောက်ခံရ၍အ​ရောင်းအဝယ်များရပ်ဆိုင်း​နေ​ကြောင်း ဈေးကွက်အတွင်းမှ သိရသည်။

ယမန့်နေ့က အ​မေရီကန်ဒေါ်တစ်ဒေါ်လာလျှင် ကျပ်၅၀၀၀ခန့်အထိ မကြုံဖူး​အောင် ဈေးမြင့်တက်ခဲ့သော်လည်း ယနေ့တွင် တစ်ဒေါ်လာကို ကျပ် ၃၆၀၀ အထိပြန်ကျဆင်းလာပြီး ဈေးကွက်အတွင်း အရောင်းအဝယ်လည်းပိတ်ထားသည်ဟု ငွေလဲလုပ်ငန်းရှင်များကပြောသည်။

“အဝယ်အရောင်းမရှိဘဲ ဈေးကျတယ်လိုပြောနေတာပါ။ အခုတော့ ငွေလဲလုပ်တဲ့သူတွေ အများစုက ဖုန်းပိတ်ပြီးရှောင်နေရတယ်”ဟုငွေလဲကောင်တာပိုင်ရှင်တစ်ဦးကပြောသည်။

​ပြည်တွင်း၌ ​ဒေါ်လာနှင့် ​ရွှေ​ဈေးများ မကြုံဖူး​အောင်မြင့်တက်ပြီး ကျပ်​ငွေတန်ဖိုးစံချိန်တင်ကျဆင်း​နေသဖြင့်စစ်ကောင်စီ၏ဗဟိုဘဏ်က နိုင်ငံခြားငွေကြေးဈေးကွက်မှတဆင့် အမေရိကန်ဒေါ်လာ သန်း ၂၀၀ ကျော်ထောက်ပံ့ပေးမည်ဟု ယမန့်နေက ထုတ်ပြန်ကြေညာခဲ့သည်။ ထိုအပြင်

Public Service Announcement

စစ်ကောင်စီလော်ဘီများ အွန်လိုင်းဒေါ်လာရောင်းဝယ်လုပ်နေသူများကို ဖမ်းဆီးမည်ဟုဆက်တိုက်ခြိမ်းခြောက်ခဲ့သည်။

“အရင်တုန်းကလိုတိုက်ရိုက်ထုတ်ရောင်းပေးမယ့်အနေအထားမှာတောင် ဈေးနှုန်းကိုထိန်းချုပ်ဖို့က အဆင်မပြေဘူး။ အခုက ဈေးကွက်တဆင့်ထောက်ပံ့မယ်ဆိုတာ ဘာဆိုလိုမှန်းမသိဘူး၊မလိမ့်တပတ်လုပ်ထားတာ”ဟု ရန်ကုန်အခြေစိုက်စီးပွားရေးလုပ်ငန်းရှင်တစ်ဦးက စစ်​ကောင်စီက ​ဒေါ်လာ သန်း ၂၀၀ ထုတ်​ရောင်း​ပေးမည်ဟု​ထုတ်ပြန်ချက်အ​ပေါ်သူ၏အမြင်ကို ပြောသည်။

သိူ့​သော်စစ်ကောင်စီကထုတ်သုံးမည်ဆို​သောဒေါ်လာသန်း၂၀၀သည် စက်သုံးဆီ တစ်လစာခန့်သာရှိပြီး စစ်ကောင်စီဘက်မှ အမှန်တကယ် ထုတ်မပေးနိုင်ပါက ဒေါ်လာဈေး၊ စက်သုံးဆီဈေး ဆက်လက်မြင့်တက်နိုင်သည်ဟု အထက်ပါလုပ်ငန်းရှင်ကသုံးသပ်သည်။

ကမ္ဘာ့ရေနံဈေးကျဆင်းခြင်းကြောင့် ပြည်တွင်းစက်သုံးဆီဈေးမှာလည်းယ​နေ့တွင် တစ်လီတာလျှင် ကျပ် ၂၀၀ခန့်ကျဆင်းသွားသည်။

အခေါက်ရွှေဈေးမှာလည်း ယမန့်နေ့က တစ်ကျပ်သားကို ကျပ် ၃၇သိန်းအထိဈေးတက်ခဲ့သော်လည်း ယနေ့တွင် ကျပ် ၇ သိန်းပြ်ကျ ပြီး ကျပ်သိန်း ၃၀ခန့်သာပေါက်ဈေးရှိတော့သည်။ ​ရွှေ​ဈေးကွက်မှာလည်း ယ​နေ့တွင်အရောင်းအဝယ်ပိတ်ထားကြောင်း ရွှေလုပ်ငန်းရှင်များကပြောသည်။

စစ်ကောင်စီလက်အောက်ခံ ရန်ကုန်တိုင်းရွှေလုပ်ငန်းရှင်အသင်းက အခေါက်ရွှေတစ်ကျပ်သားကို ကျပ်သိန်း ၂၀ကျော်သာ ယနေ့ဈေးဖွင့်ထားသည်။