ရှမ်းပြည်နယ်မြောက်ပိုင်း လားရှိုး – မူဆယ်လမ်းပိုင်း၌ ယခု ရက်ပိုင်းအတွင်း တိုက်ပွဲ ဆက်တိုက်ဖြစ်လာနေပြီး လမ်းပေါ်၌ စစ်ကောင်စီတပ် လှုပ်ရှားမှုများလည်း မကြာခဏ တွေ့နေရကြောင်း ဒေသခံတစ်ဦးက ပြောသည်။
ယနေ့တွင် ကွတ်ခိုင်မြို့နယ် မန်ပိန်းဒေသ၌ တိုက်ပွဲဖြစ်ပွားသကဲ့သို့ ယမန်နေ့ (စက်တင်ဘာ ၃ရက်)ကလည်း နမ့်ဖက်ကာရွာအနီး တိုက်ပွဲဖြစ်ခဲ့သည်ဟု ဒေသခံက ပြောသည်။
“သိန္နီဘက်ကနေထွက်လာလို့ရှိရင် မန်ပိန်းအတက် အဲဒီမှာ ဖြစ်တာ။ အဲဒီဘက်နားက များသောအားဖြင့် ကိုးကန့်အဖွဲ့တွေနေတာများတယ်။ ဟိုတစ်ခေါက်တုန်းက ပလောင်အဖွဲ့နေတယ်။ နောက်ဆက်တွဲက အခု ၄နာရီခွဲလောက်မှ ကားတွေက အကုန်တက်လာခဲ့တာပဲ။ ဖြစ်တာ လမ်းဘေးမှာ ပဲဖြစ်မယ်။ ကားတွေအကုန်လုံးရပ်ထားပြီး အကြာပြီးပဲ စောင့်နေကြရတာ” ဟု ဒေသခံက ပြောသည်။
ယမန်နေ့က နမ့်ဖက်ကာအနီးဖြစ်ခဲ့သည့် တိုက်ပွဲမှာ KIAနှင့် စစ်ကောင်စီတပ်တို့အကြား ဖြစ်ပြီး လက်နက်ကြီး ပစ်ခတ်သံများ ကြားခဲ့ရသည်ဟုဆိုသည်။
“နမ့်ဖက်ကာဘက်မှာမနေ့ကတောင်တွယ်ကျသေးတယ်။ အကြီး(လက်နက်ကြီး) ထုတာတွေရှိတယ်။ အသေးသံတွေလည်းကြားတယ်။ ပန်ကိုင်နားလေးတင်။ မနေ့ကတော့ ကေအိုင်အေနဲ့ပဲ။ညနေပိုင်း အသေးသံတွေ ရွာနားကပ်လာလို့ တရုတ်ကျောင်းတက်နေတဲ့ ကလေးတွေ ပြေးကြိုကြရတာ။ ကျွန် တော်တို့ဘက်လည်း ဒီတစ်ကြောတော့ တော်တော်များများဖြန့်ထားတာ။ဇောက်တပ်(စစ်ကောင်စီတပ်) တွေပဲ တစ်လမ်းလုံးတွေ့နေတာ။ တော်တော်ကို အင်အားဖြည့်ထားတာ။ တစ်လမ်းလုံး တော်ကြာတွေ့၊ တော်ကြာတွေ့နေတာ။ မူဆယ်နဲ့ နမ့်ဖက်ကာကြားတွေ့တာ။ ဒီအောက်ဘက် သိန္နီ၊ လားရှိုးဘက်အထိ တကြောလုံး ဖြည့်ထားတဲ့သဘော”ဟု ရှမ်းမြောက်ဒေသခံက ပြောသည်။
ရှမ်းမြောက် မူဆယ် – လားရှိုးလမ်းပိုင်း၌ ကချင်တပ်မတော်(KIA)၊ ကိုးကန့်တပ်မတော် (MNDAA)၊ တအာင်းတပ်မတော်(TNLA) တို့ အဓိက လှုပ်ရှားပြီး ယခုနောက်ပိုင်းတွင် တိုင်းရင်းသားတပ်များနှင့် ပြည်သူ့ကာကွယ်ရေးတပ်(PDF)များ ပူးပေါင်းပြီး စစ်ကောင်စီတပ်ကို တိုက်ခိုက်ခဲ့ခြင်းများရှိသည်။