ဖားကန့်မြို့တွင် မူးယစ်ရဲတပ်ဖွဲ့မှ ရဲအရာရှိတစ်ဦးအပါအဝင် သုံးဦး သေနတ်ဖြင့်ပစ်ခတ်ရှင်းလင်းခံရပြီး တစ်ဦးသေဆုံးကာ နှစ်ဦးသည် ဆေးရုံ၌ အသက်လုနေရသည်ဟု ဒေသခံများက ပြောသည်။
ဖားကန့်မြို့ မူးယစ်ရဲတပ်ဖွဲ့မှ ရဲအုပ်အောင်ကိုလတ်အပါအဝင် ရဲသုံးဦးသည် မှော်ဝမ်းရပ်ကွက်ရှိ ဆံပင်ညှပ်ဆိုင်တစ်ဆိုင်အနီးတွင် ယနေ့ညနေ ၅နာရီခန့်က ပစ်ခတ်ခံရခြင်းဖြစ်သည်။
“ ကားနဲ့ လာပစ်တာ။ တစ်ယောက်တော့ ပွဲချင်းပြီးတယ်တဲ့။ နှစ်ယောက် ဆေးရုံပို့လိုက်ရတယ်” ဟု ဒေသခံတစ်ဦးက ပြောသည်။
ရဲသုံးဦးအား ပစ်ခတ်သည့်အဖွဲ့ကို သိရလျှင်လည်း ထုတ်ပြောမည်မဟုတ်ဟု ဒေသခံအချို့က ဆိုသည်။
Public Service Announcement
“ ဆေးရုံက နှစ်ကောင်လည်း အခြေအနေမကောင်းဘူး ကြားတယ်” ဟု ဖားကန့်လူထုသပိတ်တွင် အမြဲတစေပါဝင်နေသူ ဒေသခံလူငယ်တစ်ဦးကပြောသည်။
စစ်အာဏာရှင်ဆန့်ကျင်ရေး လူထုသပိတ်အားကောင်းသည့် ဖားကန့်တွင် စစ်ကောင်စီနှင့်ရဲတပ်ဖွဲ့က ဒေသခံများအား အကြမ်းဖက်ဖမ်းဆီးမှုများ ပြုလုပ်နေသည်။
“ စခနဲ့ရခ ပါင်းပြီး လူထုကို လက်နက်အားကိုးနဲ့ ဖိနှိပ်နေတာ။ သေတာတောင်နည်းသေးတယ်” ဟု ဒေသခံအမျိုးသမီးတစ်ဦးက ပြောသည်။
သြဂုတ် ၃ရက်ကလည်း ဖားကန့်မြို့နယ် ဆိပ်မူကျေးရွာအခြေစိုက် ရဲတပ်ရင်း(၃၀)ဂိတ်ကို လက်နက်ကိုင်အဖွဲ့တစ်ဖွဲ့က လာရောက်ပစ်ခတ်ခဲ့ရာ ဒုရဲမှူးကိုကိုလွင်ဆိုသူ သေဆုံးခဲ့သည်။
စက်တင်ဘာ ၈ ရက်ကလည်း စစ်တွေနှင့်မန္တလေးမြို့တွင် ရဲအရာရှိနှစ်ဦး ပစ်ခတ်သုတ်သင်ခံလိုက်ရသည်။
