စစ်ကိုင်းတိုင်း၊ မုံရွာနှင့် ချောင်းဦးမြို့နယ်တို့ရှိ လမ်းပိုင်း သုံးခုကို ယနေ့ညနေပိုင်းမှစတင်ကာ ယာယီပိတ်ထားလိုက်ကြောင်း ချောင်းဦးမြို့နယ်ပြည်သူ့ကာကွယ် ရေးတပ်ဖွဲ့က ထုတ်ပြန်သည်။
ယနေ့နံနက်ပိုင်းက ရဲနှစ်ဦးပစ်ခတ်ခံခဲ့ရသည့် မုံရွာ-အမြင့်လမ်းနှင့် မုံရွာ-ချောင်းဦးလမ်း၊ခင်မွန်-ချောင်းဆုံလမ်းပိုင်းများကို အရေးပေါ်လိုအပ်ချက်အရ ယနေ့(စက်တင်ဘာ ၁၂ရက်) ညနေ ၅နာရီခွဲခန့်က စတင်ကာ ယခုကြေညာ ချက်ထုတ်ပြန်ချိန်မှစ၍ နောက်ထပ်တစ်စုံတစ်ရာ မထုတ်ပြန်မီအထိ အရေးပေါ်လိုအပ်ချက်အခြေအနေအရ ယာယီပိတ်ထားလိုက်ကြောင်း ချောင်းဦး PDFက အသိပေးသည်။
ယာယီပိတ်ထားချိန်အတွင်း ကြေညာချက်ပါလမ်းပိုင်းကို ဒေသခံပြည်သူတို့၏ လုံခြုံရေးအတွက် လုံးဝအသုံးမပြုကြပါရန်နှင့် လိုက်နာခြင်းမရှိသူတို့၏ လုံခြုံရေးအတွက် အာမမခံပါကြောင်း ထုတ်ပြန်ချက်တွင် ဖော်ပြထားသည်။
အထက်ပါလမ်းပိုင်းတွင် သွားလာနေကြသော မော်တော်ယာဉ်များအနေဖြင့် အန္တရာယ်ကင်းရှင်းစေရန်အတွက် ရောက်ရာအရပ်တွင် ခေတ္တရပ်နားထားကြပါရန်နှင့် အဆိုပါ လမ်းပိုင်းကိုလက်ရှိအသုံးပြုလျက်ရှိသော မိမိ၏ဆွေမျိုးမိတ်ဆွေများကို ထပ်ဆင့်အကြောင်းကြားပေးကြပါရန် ချောင်းဦး PDFက မေတ္တာရပ်ခံထားသည်။
Public Service Announcement
ယနေ့နံနက်ပိုင်းက မုံရွာ – အမြင့်လမ်းပေါ်ရှိ ညောင်ဖြူပင်ရွာတွင် စျေးဝယ်လာသည့် ရဲနှစ်ဦးပစ်ခတ်ခံရပြီး သေဆုံးခဲ့သည်။ ထို့အပြင် ပြည်သူနှစ်ဦးလည်းမိုင်းထိကာ တစ်ဦးသေဆုံးခဲ့သေးသည်။
