မန္တလေးမြို့မှာ စစ်ကောင်စီတပ်ရဲ့ လှုပ်ရှားမှုသတင်းတွေကို နေ့စဉ်ဖော်ပြပေးနေတဲ့ Voice of Mandalay ဖေ့ဘွတ်ခ် ရဲ့ Page Admin တစ်ဦးဖြစ်သူ မယုဝေမြင့်ကို စစ်ကောင်စီက ဖမ်းဆီးထားပါတယ်။
အသက် ၂၂ နှစ်အရွယ် မယုဝေမြင့်ကို စက်တင်ဘာလ ၄ရက်က အောင်မြေသာစံမြို့နယ် ၊ မြောက်ပြင်ရပ်နေအိမ်မှာ ဝင်ရောက်စီးနင်းဖမ်းဆီးခဲ့တယ်လို့သိရပါတယ်။
ဒီလို ဖမ်းဆီးလိုက်တဲ့သတင်းကိုမထုတ်ပြန်ဘဲ Voice of Mandalay ဖေ့ဘွတ်ခ်ပေ့ချ် နဲ့ဆက်စပ်သူတွေကို ဆက်လက်ဖမ်းဆီးဖို့ စစ်ကောင်စီဘက်က လုံးပမ်းနေတယ်လို့လည်းသိရပါတယ်။
စစ်တပ်အာဏာသိမ်းပြီးနောက် စစ်ကောင်စီတပ်ရဲ့ လှုပ်ရှားမှုသတင်းတွေကို အများပြည်သူ သိရှိနိုင်အောင် ကင်းထောက် ဖေ့ဘွတ်ခ်ပေ့ချ်တွေဟာ မြို့နယ်အလိုက်နီးပါး ပေါ်ပေါက်နေတာပဲဖြစ်ပါတယ်။
စစ်ကောင်စီတပ်ရဲ့ လှုပ်ရှားသွားလာတာကို ကြိုသိပြီး ရှောင်ရှားနိုင်အောင်ရည်ရွယ်ဖွင့်လှစ်ထားတဲ့ ကင်းထောက်ပေ့ချ်တွေကို အများပြည်သူကလည်း သတင်းအချက်အလက် မျှဝေပေးကြပါတယ်။