စစ်ကိုင်းတိုင်း ကောလင်းမြို့နယ်တွင် မကြာမီကာလများအတွင်း စစ်ရေးအရှိန်မြှင့်လာနိုင်၍ စားနပ်ရိက္ခာနှင့် ဆေးဝါးများစုဆောင်းထားရန်၊ လေကြောင်းရန် နှင့် ကာကွယ်ရေး ဗုံးခိုကျင်းများတူးထားကြရန် ကောလင်းမြို့ပြည်သူ့အုပ်ချုပ်ရေးအဖွဲ့က သတိ ပေးချက် ထုတ်ပြန်သည်။
အထက်ပါ သတိပေးချက်ကို ကောလင်းမြို့ ပြည်သူ့အုပ်ချုပ်ရေးအဖွဲ့ လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေးက ယနေ့ (စက်တင်ဘာလ ၂၅ရက်)ထုတ်ပြန်ခြင်းဖြစ်သည်။
စစ်ကောင်စီစစ်ကြောင်းများက ကျေးရွာအတွင်းသို့ စစ်ကြောင်းထိုးပြီးမီးရှို့ဖျက်ဆီးခြင်းများ ပြုလုပ်လာလျှင် ပြည်သူ့အုပ်ချုပ်ရေးအဖွဲ့၏ ကျေးရွာ တာဝန်ခံများက စီစဉ်ပေးသော စစ်ရှောင်စခန်းများတွင် နေထိုင်ကြရန်နှင့် လယ်တော၊ တောင်ရိုးများရှိတဲတိုက်များတွင် မနေထိုင်ကြရန် သတိပေး ထားသည်။
ပြန်လည်ဝင်ရောက်လိုပါကလည်း စစ်ရေးတာဝန်ရှိသော PDFနှင့် ပြည်သူ့ကာကွယ်ရေးအဖွဲ့ -ပကဖများက လုံခြုံရေးလုပ်ငန်းများဆောင်ရွက်ပြီးချိန် ခွင့်ပြုချက်ရရှိမှသာ ဝင်ရောက်ကြပါရန် မေတ္တာရပ်ခံထားသည်။
မကြာမီကာလများတွင် စစ်ရေးအရှိန်မြှင့်လာနိုင် သောကြောင့် စားနပ်ရိက္ခာစုဆောင်းခြင်း၊ ဆေးဝါးများစုဆောင်းခြင်း၊လေကြောင်းရန်ကာကွယ်နိုင်ရန် ဗုံးခိုကျင်းများတူးခြင်းနှင့် ကတုတ်ကျင်းများတူးထားကြပါရန်လည်း တိုက်တွန်းထားသည်။
ပြည်သူများ မလိုလားအပ်ဘဲ ထိခိုက်၊ပျက်စီး၊ဆုံးရှုံးမှုများမဖြစ်ပေါ်စေရန်အတွက် မေတ္တာရပ်ခံခြင်းဖြစ်ကြောင်း ကောလင်းမြို့ ပြည်သူ့အုပ်ချုပ်ရေးအဖွဲ့က ရှင်းပြထားသည်။ထို့အပြင် အဝေးရောက်ကောလင်းသား ကောလင်းသားများ၊ အနယ်နယ်အရပ်ရပ်မှ အလှူရှင်များအနေဖြင့်စစ်ဘေးသင့်ပြည်သူများကို ကူညီပေးကြပါရန် မေတ္တာရပ်ခံထားသည်။
စစ်ကိုင်းနှင့်မကွေးတိုင်းတွင် အထိနာပြီး ဖရိုဖရဲဖြစ်နေသည့် စစ်ကောင်စီတပ်သည် အရပ်သားနေအိမ်များ၊ ကျေးရွာများကို ယခင်ကထက် အကြမ်းဖက်ဖျက်ဆီးမှုများ ပြုလုပ်နေသည်။