မြ၀တီ-ဝေါ်လေ ကားလမ်းမပေါ်ရှိ တောင်နီကျေးရွာအနီး တောင်ကုန်းတစ်ခုပေါ်တွင် ကျူးကျော်အခြေပြုရန်ကြိုးစားလာသည့် စစ်တပ်နှင့် KNLA ပူးပေါင်းတပ်ဖွဲ့တို့အကြား ယနေ့နေ့လည်ပိုင်းက တိုက်ပွဲဖြစ်ပွားရာ စစ်ကောင်စီဘက်မှ သေဆုံးထိခိုက်မှုများရှိသည်ဟု ကော်ဘရာစစ်ကြောင်းမှ သတင်းထုတ်ပြန်ထားသည်။
စစ်ကောင်စီတပ်မ(၄၄)လက်အောက်ခံ နည်းဗျူဟာ (၄၄၃)ကွပ်ကဲမှု၏ ခမရ(၁၀၄) အား KNLA တပ်ရင်း(၂၇) ကော်ဘရာစစ်ကြောင်းနှင့် တပ်မဟာ စစ်ကြောင်း တပ်ခွဲ (၂)၊ ရောင်နီတပ်ခွဲ ဒရုန်းအဖွဲ့၊ Federal Wings ဒရုန်းအဖွဲ့ တို့ ယနေ့ စက်တင်ဘာ ၂၆ နေ့လည်ပိုင်းတွင် တိုက်ခိုက်ခဲ့သည်ဟု ထုတ်ပြန်ချက်တွင်ဖော်ပြထားသည်။
ပူးပေါင်းတပ်ဖွဲ့များ၏ ဗုံးကြဲဒရုန်းများ၊ လက်နက်ကြီးများ၊ လက်ဖြောင့်စစ်သည်များ၏ စွမ်းရည်ဖြင့် စစ်ကောင်စီဘက်မှ သေဆုံးထိခိုက်မှုများ ရှိသော်လည်း အရေအတွက်အတိအကျအား စီစစ်ဆဲဖြစ်ပြီး ပူးပေါင်းတပ်ဖွဲ့များဘက်မှ တစ်စုံတစ်ရာ ထိခိုက်မှုမရှိပါကြောင်း ကော်ဘရာစစ်ကြောင်းမှ သတင်းထုတ်ပြန်ထားချက်အရ သိရပါသည်။
