စစ်ကောင်စီ လက်အာက်ခံပျူစောထီး အဖွဲ့များသည် စစ်ဘေးရှောင်ပြည်သူများထံ သွားရောက်ကူညီနေသည့် ကုလသမဂ္ဂဝန်ထမ်းများအား ပြည်သူ့ကာကွယ်ရေးတပ်(PDF) အယောင်ဆောင်တိုက်ခိုက်ပြီး အမျိုးသားညီညွတ်ရေးအစိုးရ(NUG)၏ ဂုဏ်သိက္ခာကျဆင်းအောင် စီမံချက်ချဆောင်ရွက်နေကြောင်းသိရှိရသည်ဟု NUG ပြည်ထဲရေးနှင့် လူဝန်မှုကြီးကြပ်ရေး ဝန်ကြီးဌာနက ယနေ့တွင် အသိပေးကြေညာချက် ထုတ်ပြန်သည်။
မြန်မာနိုင်ငံရှိ ကုလသမဂ္ဂအဖွဲ့အစည်းများ၊ နိုင်ငံတကာအဖွဲ့အစည်းများနှင့် အစိုးရမဟုတ်သော နိုင်ငံတကာ အဖွဲ့အစည်းများသို့ ပန်ကြားချက်တွင် အထက်ပါအတိုင်း ဖော်ပြသည်။
အဆိုပါ အခြေအနေများကြောင့် ကုလအဖွဲ့အစည်းများ အနေဖြင့် NUG စိုးမိုးနယ်မြေများဖြစ်သော စစ်ကိုင်းတိုင်းနှင့် မကွေးတိုင်းတို့ကို သွားရောက်၍ အကူအညီပေးလုပ်ငန်းများ ဆောင်ရွက်လျင် လုံခြုံရေးနှင့် ကူညီထောက်ပံ့ရေး လုပ်ငန်းများတွင် ဒေသခံပြည်သူ့အုပ်ချုပ်ရေးအဖွဲ့များ(ပအဖ)နှင့် ဒေသခံ ပြည်သူ့ကာကွယ်ရေးအဖွဲ့(ပကဖ)များက ပူးပေါင်းကူညီဆောင်ရွက်ပေးနိုင်ရန်အတွက် ပြည်ထဲရေးနှင့် လူဝန်မှုကြီးကြပ်ရေးဝန်ကြီးဌာနသို့ အကြောင်းကြား ဆက်သွယ်ဆောင်ရွက်ပါရန် လေးစားစွာ အသိပေးအကြောင်းကြားသည်ဟု ပန်ကြားချက်၌ ပါရှိသည်။
