မကွေးတိုင်း၊ မြိုင်မြို့နယ်အရှေ့ပိုင်းရှိ ဝါးသုံးအိုင်ကျေးရွာကို စစ်ကောင်စီတပ်က နှစ်ရက်ဆက်ဖျက်ဆီးမီးရှို့ခဲ့ရာ နေအိမ်အဆောက်အအုံ ၂၄ လုံး မီးလောင်ပျက်စီးခဲ့ကြောင်း ဒေသခံများက ပြောသည်။
စစ်ကောင်စီတပ်သည် မြိုင်နယ်အရှေ့ပိုင်း ဝါးသုံးအိုင်ရွာအား အောက်တိုဘာ ၈ ရက် ညက ဝင်ရောက်လာခဲ့ပြီး အောက်တိုဘာ ၉ ရက် မွန်းလွဲ ၂ နာရီ ၄၀မိနစ်ခန့်တွင် မီးရှို့ဖျက်ဆီးခဲ့ခြင်းဖြစ်ကြောင်း၊ အောက်တိုဘာ ၁၀ ရက်တွင်လည်း ထပ်မံမီးရှို့ဖျက်ဆီးခဲ့ပြီး နေအိမ်၂၂ လုံးနှင့် နွားစာခြံ နှစ်လုံးအပါအဝင် စုစုပေါင်း ၂၄လုံး မီးလောင်ပျက်စီးခဲ့ကြောင်း ဒေသခံများက ပြောသည်။
“၉ ရက်နေ့ နေ့လယ် ၂ နာရီခွဲလောက်တစ်ခါရှို့တယ်။ ည ၁၂ လောက် တစ်ခါရှို့တယ်။ ၁၀ ရက်နေ့မနက်မှာ တစ်ခါထပ်ရှို့တယ်။”ဟု We Love Myaing အဖွဲ့ဝင်တစ်ဦးက ပြောသည်။
မီးရှို့ပြီးထွက်သွားသည့် စစ်ကြောင်းသည် ရှင်မတောင် တောင်ခြေသို့ထွက်သွားခဲ့ပြီး လမ်းတွင်ကာကွယ်ရေးအဖွဲ့များနှင့် ထိတွေ့တိုက်ပွဲဖြစ်ပွားခဲ့ကြောင်း ဒေသခံများက ပြောသည်။
Public Service Announcement
စစ်တပ်အာဏာသိမ်းပြီးနောက် မကွေးတိုင်းတွင် ၂၀၂၂ သြဂုတ် ၂၅ ရက်အထိ နေအိမ်ပေါင်း ၅၄၁၈လုံးကို စစ်ကောင်စီတပ်က မီးရှို့ဖျက်ဆီးခဲ့ပြီး စစ်ကိုင်းတိုင်းပြီးလျှင် ဒုတိယမြောက် မီးရှို့ဖျက်ဆီးခံခဲ့ရခြင်းဖြစ်သည်။
