ကြံခိုင်ရေးပါတီရဲ့ ကရင်ပြည်နယ်၊ ဘားအံခရိုင် ဥက္ကဋ္ဌ အသက် ၄၆ နှစ်အရွယ် ခွန်အောင်ကျော်မိုးဟာ ဒီနေ့မနက်ပိုင်းက နေအိမ်မှာ သေနတ်နဲ့ပစ်သတ်ခံလိုက်ရပါတယ်။
ခွန်အောင်ကျော်မိုးဟာ ဘားအံမြို့နယ်အတွင်းက သာမညရွာမှာရှိတဲ့နေအိမ်မှာ ပစ်သတ်ခံလိုက်ရတာလို့ ကြံခိုင်ရေးပါတီဝင်အချို့က ဝမ်းနည်းကြောင်းရေးသားထားကြပါတယ်။
နေအိမ်မှာ ဖွင့်ထားတဲ့ လျှပ်စစ်ပစ္စည်းအရောင်းဆိုင်မှာ ဈေးဝယ်လာသူတစ်ဦးက သေနတ်နဲ့ ၃ ချက်ပစ်ခတ်သွားတာလို့သိရပါတယ်။
ခွန်အောင်ကျော်မိုးကို ဘယ်အဖွဲ့က ပစ်ခတ်သွားတယ်ဆိုတာ ထုတ်ပြန်လာတာမရှိသေးပါဘူး။
သေဆုံးသွားတဲ့ ခွန်အောင်ကျော်မိုးဟာ ၂၀၂၀ အထွေထွေရွေးကောက်ပွဲမှာ ကရင်ပြည်နယ် ရဲ့ ပအိုဝ်းတိုင်း ရင်းသားရေးရာဝန်ကြီးနေရာ အတွက် ဝင်ပြိုင်ခဲ့သူလည်းဖြစ်ပါတယ်။
လုပ်ကြံသတ်ဖြတ်ခံရလို့ သေဆုံးသွားတဲ့ ကြံခိုင်ရေးပါတီဝင်ဟာ နှစ်ထောင်ကျော် ရှိနေပြီလို့ ကြံခိုင်ရေးပါတီဥက္ကဋ္ဌဟောင်းဦးသန်းဌေးက ပြီးခဲ့တဲ့ ပါတီညီလာခံမှာပြောသွားခဲ့ပါသေးတယ်။