နွေဦးတော်လှန်ရေးရန်ပုံငွေအတွက် ဗဟန်းမြို့နယ်ရှိ စစ်အုပ်စုပိုင် မြေကွက်များကို တော်ဝင်နွေဦး စီမံကိန်းအဖြစ်ရောင်းချရာ မြေကွက်အားလုံးရောင်းချပြီးဖြစ်သည်ဟု NUG၏ စစ်အုပ်စုအိမ်ယာနှင့်မြေကွက်များ ရောင်းချရေးအဖွဲ့(EOD)က ထုတ်ပြန်ထားသည်။
တော်လှန်ရေးရန်ပုံငွေအတွက် ရန်ကုန်မြို့တွင် စစ်အုပ်စုပိုင်မြေကွက်များကိုSpring Yangon အမည်ဖြင့်ရောင်းချနေရာ ဒုတိယအကြိမ်မြောက်အဖြစ် တောင်ဒဂုံနှင့် ဗဟန်းရှိမြေကွက်ပေါင်း (၁၁၀၀)ကျော်ကို အောက်တိုဘာ ၂၂ ရက်မှစတင်ရောင်းခဲ့သည်။ယနေ့တွင်ဗဟန်းမြို့နယ်ရှိမြေကွက်များ အားလုံးရောင်းချပြီးခြင်းဖြစ်သည်ဟု EODအဖွဲ့က ထုတ်ပြန်ထားသည်။
ယခုရောင်းကုန်ခဲ့သည့် ဗဟန်းမြေကွက် ၁၆၀ သည် တော်လှန်ရေးကာလအတွင်း ဒေါ်လာ ၂၈,၈၀၀ ပေးသွင်းရသည့်မြေကွက် ၁၂၀ နှင့် ဒေါ်လာ ၅၄,၀၀၀ပေးသွင်းရသည့် မြေကွက် ၄၀ ပါသည်။ ထိုမြေကွက် ၁၆၀ရောင်းချရာမှ ဒေါ်လာ ၅သန်းခွဲကျော်ဖိုး တော်လှန်ရေးကာလအတွင်းရရှိမည်ဖြစ်သည်။
“တော်လှန်ရေးကို ပိုမိုခက်ခဲ ကြမ်းတမ်းစွာ ရှေ့ဆက်နေချိန်မှာအရေးတကြီးလိုအပ်နေတဲ့ ဘဏ္ဍာရေးကို ဖြည့်ဆည်းပေးတဲ့ပြည်သူအပေါင်းကို ဦးညွတ် ဂုဏ်ပြုလိုက်ပါတယ်”ဟု EODအဖွဲ့ကထုတ်ပြန်သည်။
ဗဟန်းရှိ မြေကွက်များရောင်းချပြီးဖြစ်သော်လည်း တောင်ဒဂုံရှိ စစ်အုပ်စုပိုင်မြေကွက်များကို ဆက်လက်ရောင်းချနေသဆဲဖြစ်၍ တောင်ဒဂုံရှိနွေဦးအောင်လံစီမံကန်းနှင့် မန္တလေးရှိ Spring Mandalayမြေကွက်များကို ဝယ်ယူကာ တော်လှန်ရေးကို ပါဝင်ရန်လည်း NUGကတိုက်တွန်းထားသည်။
“တောင်ဒဂုံက မြေကွက် ၁၀၀၀ကျော်မှာ ၃၀၀ လောက် ရောင်းဖို့ကျန်သေးတယ်။”ဟု အရောင်းကိုယ်စားလှယ်တစ်ဦးကပြောသည်။
နွေဦးတော်လှန်ရေးရန်ပုံငွေအဖြစ် ရန်ကုန်မြို့ရှိ စစ်အုပ်စုပိုင်မြေကွက်များကို ဒုတိယအကြိမ် အောက်တိုဘာလ ၂၂ ရက်က စတင် ရောင်းချရာတွင် ၃ နာရီအတွင်း ဒေါ်လာ ၉သန်းနီးပါးရရှိခဲ့သည်။ ပထမအကြိမ် ရန်ကုန်မြို့ရှိ စစ်အုပ်စုပိုင် မြေကွက်များရောင်းချရာတွင် ဒေါ်လာ ၁၆ သန်းကျော်ရရှိထားသည်။