အာဏာသက်ဆိုးရှည်ရေးကြိုးပမ်းနေသည့် စစ်ကောင်စီ၏ ရည်ရွယ်ချက်ပျက်အောင် လက်တွဲလုပ်ဆောင်ရန် KIO တိုက်တွန်း

အာဏာသက်ဆိုးရှည်ရေး ရည်ရွယ်လုပ်ဆောင်နေသည့် စစ်ကောင်စီ၏ ရည်ရွယ်ချက်များ ပျက်သွားစေရေးအတွက် ဆက်လက်၍ လက်တွဲလုပ်ဆောင်ရန် ကချင်လွတ်လပ်ရေးအဖွဲ့(KIO)က ယနေ့(နိုဝင်ဘာ ၁ရက်) ကျရောက်သည့် မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး(ABSDF) ဖွဲ့စည်းမှု နှစ်ပတ်လည်နေ့သို့ သဝဏ်လွှာပေးပို့သည်။

ယနေ့အချိန်သည် စစ်အာဏာရှင်စနစ်ကို အမြစ်ပြတ်ဖျက်သိမ်းပြီး ဖက်ဒရယ်ပြည်ထောင်စုတည်ဆောက်ရေးကို အောင်မြင်စွာ အကောင်အထည်ဖော်သွားရန် မြန်မာနိုင်ငံသားအားလုံး ကျရာအခန်းကဏ္ဍတွင် အင်အတိုက်အားတိုက် ပါဝင်ကြိုးပမ်းနေသည့် နိုင်ငံရေးအကူးအပြောင်းကာလ အချိန်အခါကောင်းဖြစ်ကြောင်း KIOက ဆိုသည်။

တစ်ဖက်တွင် စစ်ကောင်စီတပ်သည် အာဏာသက်ဆိုးရှည်ရန် ရည်ရွယ်၍ အရပ်သားပြည်သူများအား အစုလိုက်၊ အပြုံလိုက် သတ်ဖြတ်ခြင်း၊ လူသားမဆန်စွာ မီးရှို့သတ်ဖြတ်ခြင်း၊လူနေအိမ်များနှင့် အရပ်သားများ၏ စားနပ်ရိက္ခာများကို မီးရှို့ဖျက်ဆီးခြင်း လုယက်ခြင်းစသည့် အဖျက်အမှောင့်အလုပ်ကို နိုင်ငံအနှံ့အပြားတွင် ကျူးလွန်လျက်ရှိကြောင်း KIO ၏ သဝဏ်လွှာ၌ ဖော်ပြထားသည်။

သို့ဖြစ်၍ စစ်အာဏာရှင် စစ်ကောင်စီတပ်၏ ရည်ရွယ်ချက် ပျက်ပြားသွားစေရန်နှင့် ပြည်သူလူထု တစ်ရပ်လုံးလိုလားနေသော စစ်အာဏာရှင်စနစ်ကို အမြစ်ဖြတ်နိုင်ရန်ရန်အတွက် တိုင်းရင်းသား တော်လှန်ရေးအဖွဲ့များနှင့်အတူ ဆက်လက်ပူးပေါင်းလက်တွဲသွားရန်တိုက်တွန်းလိုကြောင်း KIOက ABSDFထံ သဝဏ်လွှာပေးပို့သည်။

Public Service Announcement

ABSDF တပ်ဖွဲ့ဝင်များသည် KIO ထိန်းချုပ်နယ်မြေအတွင်း၌တည်ရှိပြီး ကချင်လွတ်လပ်ရေးတပ်မတော်(KIA)နှင့် စစ်ရေးအရ ပူးပေါင်းဆောင်ရွက်ခြင်းများရှိခဲ့သည်။

ABSDF ဖွဲ့စည်းမှု နှစ်ပတ်လည်နေ့သို့ အမျိုးသားညီညွတ်ရေးအစိုးရ(NUG)၊ ပြည်ထောင်စုလွှတ်တော်ကိုယ်စားပြုကော်မတီ၊ NUG ကာကွယ်ရေးဝန်ကြီးဌာန ပြည်ထောင်စုဝန်ကြီး ဦးရည်မွန်၊ ချင်းအမျိုးသားတပ်ဦး(CNF)၊ ကရင်နီအမျိုးသားတိုးတက်ရေးပါတီ(KNPP) အပါအဝင် တော်လှန်ရေးအင်အားစုများက သဝဏ်လွှာပေးပို့ခဲ့သည်။