ကလေးမြို့နယ်အတွင်း လမ်းဘေးသစ်ပင်ကြီးများကို စစ်ကောင်စီက လိုက်ခုတ်နေခြင်းမှာပွင့်လင်းရာသီတွင် လေကြောင်းမှ တိုက်ခိုက်နိုင်ရန် ရည်ရွယ်ခြင်းဖြစ်နိုင်ကြောင်း ဒေသခံများနှင့်ပြည်သူ့ကာကွယ်ရေးတပ်ဖွဲ့များကယူဆနေကြသည်။
ကလေး -တမူး အာရှလမ်းအကြီးအပါအဝင် ကလေးမြို့နယ်အတွင်း နေရာအများစုမှ သစ်ပင်ကြီးများကို စစ်ကောင်စီက ယခုလပိုင်းအတွင်းလိုက်ခုတ်နေသည်ကို နေ့စဥ်တွေ့နေရကြောင်း ဒေသခံများကပြောသည်။
“အပင်ကြီးတွေကို ပြီးခဲ့တဲ့ နှစ်လလောက်ကတည်းကခုတ်ရှင်းနေတာ။PDF တွေ စိုးမိုးတဲ့နေရာတင်မဟုတ်တော့ဘူး။ နေရာတော်တော်များများလိုက်ခုတ်နေတာ။ လေကြောင်းကနေ ပစ်ဖို့လားလို့ သံသယဝင်နေကြပြီ။ဒီကောင်တွေ ရည်ရွယ်ချက်မပါရင်မလုပ်ဘူး။သောက်ကျင့်မကောင်းပေမယ့် ဉာဏ်များတယ်” ဟုကလေးမြို့ခံတစ်ဦးကပြောသည်။
ပြည်သူ့ကာကွယ်ရေးတပ်ဖွဲ့များကလမ်းဘေးသစ်ပင်များပေါ်တွင်မိုင်းထောင်၍ တိုက်ခိုက်ခဲ့ဖူးသောကြောင့် သစ်ပင်များခုတ်ခြင်းဟု သတင်းများထွက်ပေါ်ခဲ့သေးသည်။ သို့သော်ယခုအခါ PDFများအားကောင်းသည့်နေရာများအပြင်တစ်မြို့နယ်လုံး နေရာအများအပြားမှသစ်ပင်ကြီးများကို ခုတ်နေခြင်းဖြစ်သည်ဟုဒေသခံများကပြောသည်။
Public Service Announcement
” စစ်ကောင်စီက သစ်ပင်တွေ ခုတ်နေတာလည်း တွေ့တယ်။ လေကြောင်းကနေ တိုက်မယ်လို့ သတင်းတွေလည်း ဒီရက်ထဲ ထွက်နေတယ်။ ကျွန်တော်တို့ကတော့ ကြိုတင်ပြင်ဆင်မှုတွေ လုပ်ထားတာရှိပါတယ်”ဟု ကလေးမြို့နယ် ပြည်သူ့ကာကွယ်ရေးတပ်ဖွဲ့မှ ရဲဘော်တစ်ဦးကပြောသည်။
သစ်ပင်များကိုလိုက်ခုတ်ရာတွင် စစ်ကောင်စီတပ်ကကိုယ်တိုင်မခုတ်ဘဲ ဆောက်လုပ်ရေးဌာနကို ခိုင်းစေခြင်းဖြစ်သည်။ ထို့ကြောင့် ဆောက်လုပ်ရေးဌာနမှ ဝန်ထမ်းများအနေဖြင့် စစ်ကောင်စီအလိုကျ လိုက်မလုပ်ကြရန်ပြည်သူ့ကာကွယ်ရေးတပ်ဖွဲ့ဝင်တစ်ဦးကသတိပေးသည်။
