ကရင်အမျိုးသားအစည်းအရုံး တပ်မဟာ(၆)နယ်မြေအတွင်းရှိ သတ္တုမိုင်းတွင်းတစ်ခုကို ယနေ့ နံနက်အစောပိုင်းက စစ်ကောင်စီတပ်က လေကြောင်းနှင့် ဗုံးကြဲတိုက်ခိုက်မှုခဲ့ရာ မိုင်းတွင်းလုပ်ငန်းခွင်ရှိ တရုတ်နိုင်ငံသားအချို့ ထိခိုက်သေဆုံးမှုများ ရှိခဲ့သည်ဟု ဒေသခံများကပြောသည်။
တပ်မဟာ(၆)နယ်မြေ ဘုရားသုံးဆူမြို့အနီးရှိ သတ္တုမိုင်းလုပ်ကွက်စခန်းတစ်ခုအား ယနေ့ နိုဝင်ဘာလ(၁၆)ရက် နံနက်(၁)နာရီ မိနစ်(၄၀)ခန့်ကပြီး စစ်ကောင်စီတပ်၏ ဖိုက်တာဂျက်လေယာဉ်ဖြင့် ဗုံးကြဲတိုက်ခိုက်ခဲ့ရာ မိုင်းစခန်းအတွင်းတွင်ရှိသည့် တရုတ်နိုင်ငံသား (၃) ဦး သေဆုံးခဲ့ကာ (၈)ဦး ဒဏ်ရာပြင်းထန်သည်ဟု သိရသည်။
ထိခိုက်ဒဏ်ရာရရှိသည့် လူနာများအား ဘုရားသုံးဆူမြို့ဆေးရုံသို့ ပို့ဆောင်ထားကြောင်း ဒေသခံတွေက ပြောကြသည်။
ယင်းသတ္တုတူးဖော်ရေးမိုင်းစခန်းသည် မကြာခင်က အသစ်ထပ်မံပြုပြင်ထားပြီး လုပ်ငန်းပြန်လည်ပတ်သည်မှာ ရက်ပိုင်းခန့်သာရှိသေးကြောင်း၊ ဒေသခံတိုင်းရင်းသားလုပ်ငန်းရှင်များနှင့် တရုတ်နိုင်ငံသားများ ပူးပေါင်းလုပ်ဆောင်နေကြောင်း ဒေသခံများက ပြောဆိုသည်။
Public Service Announcement
ပြီးခဲ့သော အောက်တိုဘာလ(၆)ရက်ကလည်း ကေအဲန်ယူ-ကရင်အမျိုးသားအစည်းအရုံး တပ်မဟာ (၆) နယ်မြေဖြစ်သည့် ဘုရားသုံးမြို့အနီး မက္ကသာကျေးရွာတွင် စစ်ကောင်စီတပ်မှ လေကြောင်းဖြင့်တိုက်ခိုက်ခဲ့သေးပြီး ဗုံးကြီးကျောင်းဆောင်ထိမှန်ပျက်စီးသွားခဲ့သလို နိုဝင်ဘာလ(၁၂)ရက်နှင့် (၁၅)ရက်တွင်မှာလည်း ချောင်းနှစ်ခွကျေးရွာနှင့် လွတ်ရှမ်းရွာအတွင်းသို့ စစ်ကောင်စီက လေကြောင်းတိုက်ခိုက်မှုများ လုပ်ဆောင်ခဲ့သေးသည်။
တပ်မဟာ (၆) နယ်မြေအတွင်းတွင်ရှိသော စစ်ကောင်စီတပ်၏ တပ်စခန်းနှင့် ရဲစခန်းများကို KNLA ပူးပေါင်းတပ်ဖွဲ့များမှ ဝင်ရောက်တိုက်ခိုက်သိမ်းပိုက်မှုများလုပ်ဆောင်ခဲ့ပြီး နှစ်ဖက်စစ်ရေးအခြေအနေပြင်းထန်ခဲ့ကာ စစ်ကောင်စီတပ်က လေယာဉ်အသုံးပြုပြီး ဗုံးကြဲတိုက်ခိုက်မှုများ ဆက်တိုက်လုပ်ဆောင်နေသည်။
