စစ်ကောင်စီတပ်ကခင်ဦးနယ်သာမက ရွှေဘိုဘက်ပါကူး၍ ​ပြည်သူ့နေအိမ်များကိုမီးရှို့ဖျက်ဆီး​နေ

▪︎ထွက်ပြေးတိမ်းရှောင်ပြည်သူ နှစ်သောင်းခန့်ရှိလာပြီး စားနပ်ရိက္ခါနှင့် အနွေးထည်၊ စောင်များ အရေးပေါ်လိုအပ်နေ

စစ်ကိုင်းတိုင်း၊ ခင်ဦးမြို့နယ်တွင်စစ်ကောင်စီတပ်ကစစ်ကြောင်းနှစ်ကြောင်းခွဲထိုးပြီးခင်ဦးမြို့နယ်သာမကရွှေဘိုနယ်ရှိ ကျေးရွာများကိုပါ ဆက်တိုက်မီးရှို့ဖျက်ဆီးနေကြောင်း ဒေသခံများကပြောသည်။

နိုဝင်ဘာလ ၁၈ ရက်ညနှင့် နိုဝင်ဘာ ၁၉ ရက်နေ့နံနက်ပိုင်းတွင် ခင်ဦးမြို့နယ်၊ပေါင်းလဲကုန်းကျေးရွာရှိ ပြည်သူများ၏နေအိမ်များကို နှစ်ရက်ဆက်တိုက် မီးရှို့ခဲ့​သောစစ်တပ်သည် ယနေ့ (နိုဝင်ဘာလ၂၀ရက် )နံနက်ပိုင်းတွင် ရွှေဘိုမြို့နယ် မြောက်ခြမ်း လိပ်ရကုန်းကျေးရွာနှင့် လက်ပံကြီးရွာတို့အား လက်နက်ကြီးငယ်များ ရမ်းသမ်းပစ်ခတ်အကြမ်းဖက်ဝင်ရောက်ခဲ့ပြီးမီးရှို့ခဲ့ကြောင်းခင်ဦးမြို့နယ်သတင်းမှန်ပြန်ကြားရေးအဖွဲ့က ပြောသည်။

“ယနေ့တစ်ရက်ထဲလိပ်ရကုန်းရွာနဲ့ လက်ပံကြီးရွာမီးဆက်ရှို့ခြင်းဖြစ်ပါတယ်။ပေါင်းလဲကုန်းရွာထဲလည်းကျန်ပါသေးတယ်။ ရွာပြန်ကပ်လို့မရသေးဘူး။”ဟု ခင်ဦးမြို့နယ်သတင်းမှန်ပြန်ကြားရေးက ပြောသည်။

တဖက်တွင်လည်း ခင်ဦးနယ်အတွင်းသို့ကန့်ဘလူနယ်ဘက်မှလာသည့်စစ်ကောင်စီတပ် စစ်ကြောင်းတစ်ကြောင်းထိုးနေပြီး ယနေ့နံနက်ပိုင်းက ခင်ဦးနယ်၊ နှဲတွင်းရွာ၊ ဆီဆုံလေးရွာဝန်းကျင်၌ နေအိမ်များကို မီးရှို့ဖျက်ဆီးခဲ့ကြောင်း ဒေသခံများက ပြောသည်။

Public Service Announcement

ထို့အပြင်ဘုန်းကြီးကျောင်းအတွင်းစစ်ရှောင်များထံမှအဖိုးတန်လက်ဝတ်ရတနာများအားလုယူသွားကြောင်း ဒေသခံများက ပြောသည်။

စစ်ကောင်စီစစ်ကြောင်းသည်နိုဝင်ဘာလ၁၅ရက်နေ့တည်းက ရေဦးမြို့မှ အင်အား ၁၀၀ခန့်ဖြင့် ခင်ဦအနောက်တောင်ခြမ်း ကျေးရွာများအားတောက်လျှောက်စစ်ကြောင်းထိုးဖျက်ဆီး​နေခြင်းဖြစ်သည်။

ခင်ဦးမြို့နယ် ၈ရွာခန့်နှင့် ရွှေဘိုမြို့နယ် ၄ရွာခန့် လူဦးရေ ၂၀၀၀၀(နှစ်သောင်း)ကျော် ဘေးလွတ်ရာ စစ်ဘေးရှောင်နေရသောကြောင့် အနွေးထည်၊စောင်များ ပိုမိုလိုအပ်လာပြီး စားစရာများ အခက်အခဲဖြစ်နေကြောင်း ခင်ဦးမြို့နယ်သတင်းမှန်ပြန်ကြားရေးကပြောသည်။