တမူး-ကလေးအာရှလမ်းမကြီးပေါ်မှ တမူး-ခမ်းပတ်မြို့အထိလမ်းပိုင်းကို ပြည်သူလူထု၏ စားဝတ်နေရေး၊ ကုန်စည်စီးဆင်းမှုများစသည့်တို့ အခက်အခဲများ မဖြစ်ပေါ်စေရန် နိုဝင်ဘာ ၂၂ ရက်မှစတင်ကာ ဖြတ်သန်းသွားလာနိုင်ပြီးဖြစ်ကြောင်းပြည်သူ့ကာကွယ်ရေးတပ်မတာ်- PDF(တမူး) တပ်ရင်း -၃ထုတ်ပြန်သည်။
တမူး-ခမ်းပတ်လမ်းပိုင်းကို ပြန်လည်ဖွင့်လှစ်ပေးသော်လည်း ခမ်းပတ်မြို့ မှ ကလေးမြို့အထိလမ်းပိုင်းကိုမူ ပိတ်ပင်ထားဆဲဖြစ်သည်။
တမူးPDF တပ်ရင်း-၃ သည် အဆိုပါလမ်းပိုင်းတွင် ပြီးခဲ့သည့် ရက်သတ္တပတ်အတွင်း စစ်ရေးတင်းမာမှုအခြေအနေနှင့် စစ်ကောင်စီတပ်က လက်နက်များသယ်ဆောင်မည်သတင်းများကြောင့် နိုဝင်ဘာ ၁၂ ရက်မှ နိုဝင်ဘာ ၂၁ ရက်အထိလမ်းကိုယာယီပိတ်ပင်ခဲ့ခြင်းဖြစ်သည်။
ယခုက ပြည်သူများ၏ စားဝတ်နေရေး၊ လူမှုရေး၊ ကျန်းမာရေးနှင့်ကုန်သည်စီးဆင်းမှု အခက်အခဲများ မဖြစ်ပေါ်စေရန် တမူး-ခမ်းပတ်လမ်းကို နိုဝင်ဘာ ၂၂ရက်မှစတင်ပြီး ပြန်လည်ဖွင့်လှစ်ပေးလိုက်ခြင်းဖြစ်သည်ဟု PDF(တမူး)တပ်ရင်း-၃ က ယမန်နေ့ကထုတ်ပြန်သည်။
“တမူးနဲ့ ခမ်းပတ်ကြားပဲ သွားလို့ရတာပါ။ ကလေးမြို့ကနေ ခမ်းပတ်မြို့အထိ ပိတ်ထားဆဲပါ”ဟု တမူးမြို့ခံတစ်ဦးကပြောသည်။
ရုရှားမှ သယ်ယူလာသည်ဆိုသော လက်နက်များကိုအိန္ဒိယနိုင်ငံမှတစ်ဆင့် နယ်စပ်လမ်းကြောင်းမှ တမူး၊ ကလေးမြို့ သို့စစ်ကောင်စီက အရပ်သားကား ၁၄ စီးဖြင့် သယ်ယူနေပြီး ကလေး-တမူးလမ်းတလျောက် ဒေသခံကာကွယ်ရေးတပ်များနှင့် စစ်ကောင်စီတပ်တို့ကြားတိုက်ပွဲများပြင်းထန်နေခြင်းဖြစ်သည်။
“မနက်(နိုဝင်ဘာ ၂၂ ရက်)ကတော့ ခမ်းပတ်မြို့ကို ရောက်တယ်လို့ သတင်းရပါတယ်ဗျ”ဟု PDF(တမူး) တပ်ရင်း-၃ တာဝန်ရှိသူကပြောသည်။
ယမန်နေ့က စစ်ကောင်စီတပ်၏ ရှေ့ပြေးစစ်ကြောင်းကို PDF(တမူး)တပ်ရင်း-၃ က နိုဝင်ဘာ ၂၀ တွင်ပဒေသာမိုင်းဖြင့် ဖောက်ခွဲတိုက်ခိုက်ခဲ့ရာ စစ်ကောင်စီတပ်သား ၁၀ ဦးကျော်သေဆုံးခဲ့သည်ဟုအထက်ပါတာဝန်ရှိသူဆက်ပြောသည်။