ခင်ဦးနယ်တွင် စစ်ကောင်စီတပ်က နင်းမိုင်းများထောင်ထားခဲ့၍ ပြည်သူများသတိပြုသွားလာကြရန် တော်လှန်ရေးအဖွဲ့များ သတိပေး

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်တွင် စစ်ကောင်စီတပ်က အများပြည်သူသွားလာရာလမ်းများ၌ မြေမြှုပ်နင်းမိုင်းများထောင်ထားခဲ့၍ ပြည်သူများသတိပြုသွားလာကြရန် နယ်မြေခံ တော်လှန်ရေးအဖွဲ့သားများက သတိပေးသည်။

ယမန်နေ့(နိုဝင်ဘာ ၂၆ ရက်)က ရွှေဘိုခရိုင်၊ ခင်ဦးမြို့နယ်အတွင်းရှိ လမ်းပိုင်းများဖြစ်သော ခင်ဦး – ရွှေဘိုလမ်း(ရွှေဘို-မြစ်ကြီးနားလမ်း) ခင်ဦး – ရေဦး လမ်းပိုင်းတို့တွင် စစ်ကောင်စီတပ်က ကင်းထောက်ကင်းပုန်းများ နေရာအသီးသီးခွဲ၍ ချထားခဲ့သည်။

စစ်ကောင်စီတပ်သည် ယမန်နေ့ နံနက်ပိုင်းက ရွှေဘိုလေ့ကျင့်ရေး(၈) မြောက်ဘက်၊ ခင်ဦးမြို့နယ် ရွှေပြည်သာကျေးရွာအနီး၌ မြေမြှုပ်နင်းမိုင်းများ ထောင်ထားခဲ့ကြောင်း၊ အဆိုပါ မြေမြှုပ်နင်းမိုင်းနင်းမိ၍ နွားတစ်ကောင် သေဆုံးခဲ့ကြောင်း ခင်ဦးမြို့နယ်သတင်းမှန်ပြန်ကြားရေးအဖွဲ့က ပြောသည်။

ထို့ကြောင့် ပြည်သူများအနေဖြင့် အဆိုပါ လမ်းပိုင်းတို့၏ ဝဲယာအနီး ဖြတ်သန်းခြင်း မပြုလုပ်ကြရန် ခင်ဦးမြို့နယ်သတင်းမှန်ပြန်ကြားရေးအဖွဲ့က သတိပေးသည်။

Public Service Announcement

ယာဥ်များအတွက် ခင်ဦး – ရေဦး လမ်းပိတ်ထားသည်မှာ ၄လကျော်ပြီ ဖြစ်သော်လည်း နွားကျောင်းသားများ၊တောင်သူများ သတိထားပေးကြရန် ခင်ဦးမြို့နယ်သတင်းမှန်ပြန်ကြားရေးအဖွဲ့က ထပ်မံသတိပေးသည်။

ယမန်နေ့ကလည်း ခင်ဦးမြို့နယ် မြေနီသျှိုလမ်းဆုံရောက်ရှိနေသော စစ်ကောင်စီတပ်က ရွှေဘို – မြစ်ကြီးနားလမ်းတစ်လျှောက် ဖြတ်သန်းသွားလာသော ယာဥ်များအား တစ်စီးလျှင် ကျပ်တစ်သိန်း အဓမ္မတောင်းယူနေ၍ ခရီးသွားများအနေဖြင့် သတိထားရှောင်ကွင်းသွားလာကြရန် ခင်ဦးမြို့နယ်သတင်းမှန်ပြန်ကြားရေးအဖွဲ့က ပြောသည်။