စစ်ကိုင်းတိုင်း၊ ဆားလင်းကြီးမြို့နယ်တွင် စစ်ကောင် စီတပ်က တစ်ပတ်အတွင်း ကျေးရွာခြောက်ရွာမှ နေအိမ်၂၆၀ကျော် မီးရှို့ဖျက်ဆီးခဲ့ရာ အဘွားအိုနှစ်ဦးပါ မီးထဲပါသေဆုံးခဲ့ကြောင်း ဒေသခံများက ပြောသည်။
နိုဝင်ဘာ၃၀ရက်ကတည်းက ဆားလင်းကြီးမြို့နယ်အတွင်းရှိ ကျေးရွာများအား မီးရှို့ဖျက်ဆီးနေသော စစ်ကောင်စီတပ်သည် ယမန်နေ့ (ဒီဇင်ဘာ ၅ရက်) တစ်ရက်တည်း ကျေးရွာသုံးရွာကို ဆက်တိုက် မီးရှို့ဖျက်ဆီးခဲ့သည်။
ရေမိန်တောင်ရွာမှ အိမ်ခြေ(၅၀)နှင့် ရေမိန်မြောက်ရွာမှ နှစ်အိမ်ကို မီးရှို့ဖျက်ဆီးခဲ့ပြီး ညနေပိုင်းတွင် တရားကျေးရွာကိုမီးရှို့ခဲ့ကြောင်း ဒေသခံများက ပြောသည်။
“စစ်ကောင်စီကို ဓါးနဲ့တုံးပြီး အဲဒီမီးဖိုထဲကို ထည့်ချင်တာ။”ဟု ရေမိန်တောင်ရွာ ဒေသခံတစ်ဦးက ပြောသည်။
Public Service Announcement
ယမန်နေ့ညက တရားကျေးရွာ၌ ညအိပ်တပ်စွဲခဲ့သော စစ်ကောင်စီတပ်သည် ယနေ့ (ဒီဇင်ဘာ၆ ရက်) နံနက်ပိုင်းတွင် တရားကျေးရွာကို နေရာသုံးနေရာခွဲ မီးရှို့နေပြီး ရှမ်းကိုင်းဘက်ကိုဦးတည်နေကြောင်း ဆားလင်းကြီးမြို့နယ်သတင်းမှန်ပြန်ကြားရေးအဖွဲ့က ပြောသည်။
စစ်ကောင်စီတပ်သည် နိုဝင်ဘာ ၃၀ ရက်မှစတင်ကာ ထန်းဇင်၊ ဆားထုံး၊လက်ပန်ကျွန်း၊တောကျောင်းကျေးရွာများအား မီးရှို့ဖျက်ဆီးသွားခဲ့သည်။
တောကျောင်းရွာမှနေအိမ် ၃၆ လုံး၊ လက်ပန်ကျွန်းရွာမှ ၃၂လုံး၊ ဆားထုံးရွာမှ ၁၂၅အိမ်၊ ထန်းဇင် မှ ၂၄အိမ်မီးလောင်ပျက်စီးခဲ့ကြောင်း၊ ထို့အပြင် ဆားထုံးကျေးရွာ မီးရှို့ဖျက်ဆီးခံရချိန် အဘွားအိုနှစ်ဦးလည်း မီးလောင်သေဆုံးခဲ့ကြောင်း မျိုးဆက်သစ်လူငယ် Local PDF အဖွဲ့က ပြောသည်။
