ပဲခူးခရိုင်၊ ကျောက်တံခါးမြို့ သတိပဌာန်ရပ်ကွက်မှ စစ်ကောင်စီခန့် အုပ်ချုပ်ရေးမှူးတစ်ဦးကို ‘နန်းထိုက်အောင်’ စစ်ဆင်ရေးအဖြစ် ပစ်ခတ်လိုက်ကြောင်း ပဲခူးတိုင်းစစ်ဒေသခွဲက ယနေ့(ဒီဇင်ဘာ ၈)ထုတ်ပြန်သည်။
ယမန်နေ့ညနေ ၅ နာရီခန့်က သတိပဌာန်ရပ်ကွက် အုပ်ချုပ်ရေးမှူး အောင်လှိုင်ဝင်း(ခ)ကုလားကြီးအား ဗိုလ်ကျောက်ခဲ ဦးဆောင်သော မြို့ပြပျောက်ကြားအဖွဲ့က ပစ်ခတ်ခဲ့သည်ဟု ဆိုသည်။
“အဆိုပါ စစ်ဆင်ရေးတွင် အောင်လှိုင်ဝင်း(ခ) ကုလားကြီးအား သေနတ်ဖြင့် (၄)ချက် ပစ်ခတ်ခဲ့ရာ နေရာ၌ပင် သေဆုံးသွားခဲ့သည်”ဟု ဖော်ပြသည်။
သေဆုံးသူ စစ်ကောင်စီခန့် အုပ်ချုပ်ရေးမှူးထံမှ လက်လုပ်သေနတ်အတို တစ်လက်၊ စည်းတံဆိပ်၊ မှတ်ပုံတင်နှင့် အခြားစာရွက်စာတမ်းများ သိမ်းဆည်းရရှိကြောင်း အသိပေးသည်။
ထို့အပြင် တော်လှန်ရေးရဲဘော်များမှာ စစ်ဆင်ရေးကို အောင်မြင်စွာလုပ်ဆောင်နိုင်ခဲ့ပြီး အထိအခိုက်မရှိ ဆုတ်ခွာနိုင်ခဲ့ကြောင်း ထုတ်ပြန်ထားသည်။ အထက်ပါ စစ်ရေးတိုက် ခိုက်မှုနှင့်စပ်လျဥ်းပြီး People’s Springက ပဲခူးတိုင်းစစ်ဒေသခွဲထံ ဆက်သွယ်ထားသော်လည်း အဆက်အသွယ်မရသေးပေ။