မန္တလေးတိုင်း သပိတ်ကျင်းမြို့နယ်တွင် ခရီးသွားပြည်သူများ၏ယာဥ်များကို ဖမ်းဆီး၊ ငွေညှစ်ပြီးပြန်လာသည့် စစ်ကောင်စီတပ်မှ ဗိုလ်မှူးတစ်ဦးပါဝင်သောယာဥ်တန်းအား မိုင်းခွဲတိုက်ခိုက်ခဲ့ကြောင်း ပြည်သူ့ကာကွယ်ရေးတပ်ဖွဲ့ – ကြာညှပ်က ပြောသည်။
ယမန်နေ့(ဒီဇင်ဘာ ၂၁)ညနေ ၆ နာရီခွဲခန့်က မန္တလေး – ဗန်းမော်လမ်းပိုင်း ဆယ်ဇင်းကုန်းကျေးရွာထိပ်နားတွင် ခရီးသွားယာဥ်များအား ဖမ်းဆီး၊ ငွေညှစ်ပြီး ဆိုင်ကယ်ဖြင့်ပြန်လာသော ရဲနှင့်စစ်သား အင်အား (၈)ဦးပါ စစ်ကောင်စီတပ်ကို ကိုးပင်နှင့် ပုတီးဖြူရွာကြားတွင် စလက်မိုင်းနှစ်လုံး၊ ရှေ့ထွက်မိုင်းနှစ်လုံးဖြင့် ဖောက်ခွဲတိုက်ခိုက်ခဲ့ခြင်း ဖြစ်သည်။
တိုက်ခိုက်မှုကြောင့် စစ်ကောင်စီတပ်မှ ခုနစ်ဦးသေဆုံးပြီး မိုင်းခွဲသည့်နေရာသို့ လူနာတင်ယာဥ်များရောက်ရှိလာကာ သေဆုံးဒဏ်ရာရသူများအား ပြန်သယ်သွားကြောင်း ပြည်သူ့ကာကွယ်ရေးတပ်ဖွဲ့ – ကြာညှပ်က ပြောသည်။
“သေတဲ့အထဲ ဗိုလ်မှူးပါ၊မပါ တိကျမသိလိုက်ရဘူးဗျ။ တခါတည်း ကား နှစ်စီးနဲ့ သယ်သွားလို့ပါ”ဟု ပြည်သူ့ကာကွယ်ရေးတပ်ဖွဲ့ – ကြာညှပ်မှ တော်လှန်ရေးရဲ ဘော်တစ်ဦးက ရှင်းပြသည်။
Public Service Announcement
အထက်ပါ မိုင်းခွဲတိုက်ခိုက်မှုကို သပိတ်ကျင်းမြို့နယ် ပြည်သူ့ကာကွယ်ရေးတပ်ဖွဲ့(ပကဖ)၊ လျှပ်စီးပြောက်ကြားတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့ – ကြာညှပ်တို့ ပူးပေါင်းလုပ်ဆောင်ခဲ့ခြင်းဖြစ်ပြီး တော်လှန်ရေးရဲဘော်များ အထိအခိုက်မရှိ ပြန်ဆုတ်နိုင်ခဲ့ကြောင်း အထက်ပါရဲဘော်က အသိပေးသည်။
ယနေ့(ဒီဇင်ဘာ ၂၂)နံနက်ပိုင်းတွင် ယမန်နေ့က တိုက် ခိုက်မှုလုပ်ဆောင်ခဲ့သည့်နေရာသို့ စစ်ကောင်စီတပ်သား အင်အား (၂၀)ခန့်ရောက်ရှိနေပြီး မန္တလေး-ဗန်းမော်လမ်းအား ပိတ်ဆို့စစ်ဆေးလျှက်ရှိကြောင်း သိရသည်။
