ရန်ကုန်မြို့ ဒဂုံမြို့သစ်မြောက်ပိုင်းမြို့နယ်၌ စစ်ကောင်စီ၏ ရွေးကောက်ပွဲအတွက်သန်းခေါင်စာရင်းကောက်ယူရာတွင် ဦးဆောင်သည့် ဗိုလ်မှူးဟောင်းတစ်ဦး ပစ်သတ်ခံရ ကြောင်း ဒေသခံသတင်းရင်းမြစ်များက လူထုနွေဦးသို့ ပြောသည်။
ပစ်ခတ်ရှင်းလင်းခံရသည့် ဦးရွှေဝင်းသည် စစ်ကောင်စီ၏ ကာကွယ်ရေးဝန်ကြီးဌာန၊စာရင်းစစ်ဌာနမှ လက်ထောက်ညွှန်ကြားရေးမှူးအဖြစ် လုပ်ကိုင်နေသူဖြစ်ကြောင်းလည်း ၎င်းတို့က ဆိုသည်။
၎င်းမှာ ယနေ့(ဇန်နဝါရီ ၂၀ ရက်) နံနက် ၇နာရီခန့်က မြောက်ဒဂုံ(၄၀)ဈေးသို့ လာရောက်စဥ် အမည်မသိအဖွဲ့က ဦးခေါင်းအား သေနတ်ဖြင့် ပစ်သတ်ခဲ့ခြင်း ဖြစ်သည်။
“ ဖြစ်ဖြစ်တုန်းကဆို (၄၀)စျေး ထိပ်လမ်းကိုလည်း ပိတ်တယ်။ပြီးတော့ ဗိုလ်မင်းရောင်နဲ့ ရာဇာဓရာဇ်လမ်းဆုံကိုပါ စစ်ကားနှစ်စီးနဲ့ ပိတ်စစ်တာ။အခုလည်း စစ်တပ်ဒလန် မိုးဝင်းဦးဆောင်ပြီး လာပစ်တဲ့သူတွေရဲ့ပုံစံပါ လိုက်မေးနေတယ်” ဟု (၄၀)ရပ်ကွက်နေပြည်သူတစ်ဦးက ရှင်းပြသည်။
ဦးရွှေဝင်းသည် (၄၀)ဈေးအနီးနေထိုင်ပြီး ၎င်း၏သားဖြစ်သူမှာလည်း လက်ရှိ စစ်ကောင်စီလက်အောက်တွင် ဗိုလ်ကြီးရာထူးနှင့် အလုပ်လုပ်ကိုင်နေကြောင်း ရပ်ကွက်နေသူများထံမှသိရှိရသည်။
ဗိုလ်မှူးဟောင်းနှင့် လက်ထောက်ညွှန်ကြားရေးမှူး ပစ်ခတ်ရှင်းလင်းခံရမှုကြောင့် ရန်ကုန်မြို့ရှိ မီးပွိုင်များ အပါအဝင် လမ်းမအများစု၌ ယာဥ်စစ်ဆေးမှုများစွာကြုံတွေ့နေရသည်ဟုလည်း အငှားယာဥ်မောင်းများက အသိပေးသည်။
