ဒီးမော့ဆိုမြို့နယ်တွင် ကင်းထောက်အဖွဲ့ထောင်ထားသောမိုင်းကို စစ်ကောင်စီတပ်ဖွဲ့မှ နင်းမိပြီး သေဆုံးမှုများရှိခဲ့ကြောင်း အလယ်ပိုင်းတိုင်း(၁၁၀၂)တပ်ရင်းက ယနေ့ ထုတ်ပြန်သည်။
အလယ်ပိုင်းတိုင်း ဒီးမော့ဆို(၁၁၀၂)တပ်ရင်း ကင်းထောက်တပ်ဖွဲ့သည် ဇန်နဝါရီ ၇ရက်တွင် စစ်ကောင်စီတပ်များ လှုပ်ရှားသွားလာနေသည့် နေရာတွင် မိုင်းများဆင်ထားခဲ့သည်ဟု ဆိုသည်။
ယင်းမိုင်းများကို ဇန်နဝါရီ ၁၈ရက် နံနက် ၄နာရီတွင် စစ်ကောင်စီတပ်များ နင်းမိပြီးထိခိုက်သေဆုံးမှုများရှိခဲ့ကြောင်း ဖော်ပြခဲ့ခြင်း ဖြစ်သည်။
စစ်ကောင်စီတပ်များမှ သေဆုံးနေသော အလောင်းများဆွဲထုတ်သွားကာ သွေးကွက်များကို မြေကြီးဖြင့် ဖုံးထားခဲ့သည်ဟု ဆိုသည်။
Public Service Announcement
သို့သော် စစ်ကောင်စီတပ်မှ သေဆုံးမှုများ၊ ထိခိုက်မှုအရေအတွက်ကိုမူ အတိအကျ အတည်မပြုနိုင်သေးပေ။
ရဲဘော်များမှ နေ့စဥ်ကင်းထောက်မှုများပြုလုပ်နေပြီး စစ်အာဏာရှင်ကို အမြစ်ပြတ်သည်အထိ တိုက်ထုတ်သွားမည်ဟုလည်း အလယ်ပိုင်းတိုင်း ဒီးမော့ဆို(၁၁၀၂)တပ်ရင်းအသိပေးသည်။
“(၆)မိုင်ဘက်မှာ နေ့စဥ်ထိတွေ့မှုရှိသလို စကစဘက်က လက်နက်ကြီးနဲ့နေ့တိုင်းပစ်ခတ်နေတယ်”ဟု ဒီးမော့ဆိုမြို့နယ်ပြည်သူ့ကာကွယ်ရေးတပ်ဖွဲ့ဝင်တစ်ဦးက လူထုနွေဦးသို့ ပြောသည်။
ဒီးမော့ဆိုမြို့နယ် (၆)မိုင်စံပြလမ်းမကြီးတစ်လျှောက် စစ်ကောင်စီက စစ်ကြောင်းသုံးခုခွဲ ၍ ဝင်ရောက်လာပြီးနောက် နေ့စဥ်တိုက်ပွဲဖြစ်ပွားနေကာ စစ်ကောင်စီတပ်မှ ခုနစ်ဦးထက်မနည်းသေဆုံးထားကြောင်း ကရင်နီအမျိုးသားများကာကွယ်ရေးတပ်(KNDF)တပ်ရင်း – ၉က ယမန်နေ့တွင် ထုတ်ပြန်ထားသည်။
