မန္တလေးတိုင်း၊ မြင်းခြံခရိုင်၊ ငါန်းဇွန်မြို့နယ်တွင် စစ်ကောင်စီတပ်နှင့်ရဲများ၏ ထောက်ပို့ထွက်လာသောယာဥ်အား ပဒေသာမိုင်းဖြင့် ဖောက်ခွဲတိုက်ခိုက်ခဲ့ကြောင်း ဇာမဏီပြောက်ကျားတပ်ဖွဲ့က သတင်းထုတ်ပြန်သည်။
ယမန်နေ့ (ဇန်နဝါရီ ၂၄ ရက်)က ငါန်းဇွန်မြို့နယ်၊ မြို့သာမှ ထောက်ပို့ထွက်လာသော စစ်ကောင်စီတပ်နှင့်ရဲများ၏ ဆိုင်ကယ် နှစ်စီး နှင့် ကားတစ်စီးအနက် ဆိုင်ကယ်ကို လွှတ်ပေးပြီး ကားကို အဓိကထား မိုင်းဆွဲတိုက်ခိုက်ခဲ့ခြင်းဖြစ်သည်။
အဆိုပါထောက်ပို့ယာဥ်အား တောင်လယ်တောရွာနှင့် ရွာသာကျေးရွာကြားတွင် ပဒေသာမိုင်း ခြောက်လုံးဖြင့် အတွဲလိုက် မိုင်းဆွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင် သုံးဦးနေရာတွင်သေဆုံးခဲ့ကြောင်း ဇာမဏီပြောက်ကျားတပ်ဖွဲ့က အသိပေးသည်။
အဆိုပါ ယာဥ်မှာ လမ်းဘေးထိုးရပ်သွားခဲ့ပြီး ထိခိုက်သေဆုံးမှုတိုးလာနိုင်ကြောင်း၊ ဆိုင်ကယ်ပေါ်မှ စစ်ကောင်စီတပ်များက ပြန်လည်ပစ်ခက်သောကြောင့် ရဲဘော်များ ဆုတ်ခွာခဲ့ကြောင်းး ဇာမဏီပြောက်ကျားတပ်ဖွဲ့က ဆိုသည်။
Public Service Announcement
ဖြစ်စဥ်နှင့်ပတ်သက်၍ ဇာမဏီပြောက်ကျားတပ်ဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
“ငါန်းဇွန်မြို့ကို ရိက္ခာလာပို့တဲ့ကားကို နှစ်နေရာခွဲပြီး မိုင်းဆွဲတယ်လို့ကြားတယ်”ဟု ငါန်းဇွန်မြို့ဒေသခံတစ်ဦးက ပြောသည်။
အဆိုပါ စစ်ဆင်ရေးကို ဇာမဏီပြောက်ကျားတပ်ဖွဲ့(ငါန်းဇွန်)နှင့် MN PDF Myitnge. မန္တလေးခရိုင်အမှတ်.(၅)တပ်ရင်းတို့ ပူးပေါင်းလုပ်ဆောင်ခဲ့ကြောင်း အသိပေးထားသည်။
ငါန်းဇွန်မြို့နယ်တွင် စစ်ကောင်စီတပ်က CDM ဝန်ထမ်းများအပါအဝင် ဒေသခံပြည်သူများအားဖမ်းဆီးနှိပ်စက်ခြင်းများ ပြုလုပ်နေပြီး ဇန်နဝါရီ ၁၇ကလည်း ရွှေပေါက်ပင်ကျွန်းရှိ နေအိမ်အများအပြားအား မီးရှို့ဖျက်ဆီးသွားခဲ့သေးသည်။
