ကရင်နီ(ကယား)ပြည်နယ်၊ လွိုင်ကော်-ဖယ်ခုံလမ်းမတိုက်ပွဲတွင် စစ်ကောင်စီတပ်မှ ငါးဦးသေဆုံးပြီး ကရင် နီပူးပေါင်းတပ်မှ တစ်ဦးကျဆုံးခဲ့ကြောင်း ဖယ်ခုံ PDF တပ်ရင်း (၂ )က ယနေ့ ထုတ်ပြန်သည်။
စစ်ကြောင်းထိုးလာသည့် စစ်ကောင်စီတပ်ကို ဖေဖော်ဝါရီ ၄ ရက် ည ၁၀ နာရီခွဲခန့်တွင်ဖယ်ခုံ PDF တပ် ရင်း( ၂ )၊ ကရင်နီအမျိုးသားများကာကွယ်ရေးတပ်-KNDF တပ်ရင်း (၃) နှင့် URF တို့ ပူးပေါင်းခုခံတိုက်ခိုက်ခဲ့သည်။
“တိုက်ပွဲက နှစ်နာရီကျော်ကျော်လောက်ကြာတယ်။ စကစ ဘက်က အထိနာတော့ လွိုင်ကော်နဲ့ ဖယ်ခုံ အခြေစိုက်တပ် တွေကနေ လက်နက်ကြီး အဆမတန်ပစ်ကူတယ်။အခုထိလည်း စစ်ရေးအရ တင်းမာနေဆဲပဲ”ဟု ဖယ်ခုံ PDF တပ်ရင်း( ၂ )နှင့် နီးစပ်သူတစ်ဦးက People’s Springသို့ ပြောသည်။
ထို့အပြင် ယမန်နေ့ည တိုက်ပွဲ၌ စစ်ကောင်စီတပ်မှ သေဆုံးသူ ငါးဦး အပြင် ပြင်းထန်ဒဏ်ရာ ၉ ဦးရှိကြောင်းလည်း ဖယ်ခုံ PDF တပ်ရင်း( ၂ )က အတည်ပြုသည်။
Public Service Announcement
အလားတူ ဖယ်ခုံ PDF တပ်ရင်း ၂ မှ ရဲဘော် ဒေးဗစ် မှာ ပြည်သူ့အတွက်တိုကိပွဲဝင်ရင်းအသက်စွန့်ခဲ့ရပြီး KNDFရဲဘော် ၂ ဦးထိခိုက်ဒဏ်ရာရရှိခဲ့သည်။
ကျဆုံးခဲ့သောရဲဘော်ဒေးဗစ်၏ရုပ်အလောင်းကို ယနေ့ နံနက် ၁၀ နာရီ အချိန်တွင် သဂြိုလ်ပြီးစီးခဲ့သည်။
ထိုတိုက်ပွဲနှင့်ဆက်စပ်၍လည်း စစ်ကောင်စီတပ်က လွိုင်ကော်မြို့ ဝါရီကောခူကျေးရွာဘက်သို့ လက်နက်ကြီးဖြင့် ပစ်ခတ်ခဲ့သောကြောင့်ဘုရားကျောင်းနှင့် လူနေအိမ် ၂၀ကျော် ပျက်စီးခဲ့ရပြီး ဒေသခံများစစ်ဘေးရှောင်နေရဆဲ ဖြစ်သည်။
